09.10.2026 | 13:48
Վարչապետի խոսնակը՝ Փաշինյանի՝ ադրբեջաներեն երգի ուղեկցությամբ հրապարակված տեսանյութի մասին
Իրանը ծրագրել է ոչնչացնել ԱՄՆ նախկին բարձրաստիճան պաշտոնյաներին․ CNN
Քաղաքականություն
11.08.2022 | 21:35
ԱՄՆ Արդարադատության նախարարությունը հայտարարել է, որ Իրանի հեղափոխության պահապանների կորպուսի անդամ Շահրամ Փուրսաֆիին մեղադրանք է առաջադրվել՝ Սպիտակ տան նախկին խորհրդական Ջոն Բոլթոնի և ԿՀՎ նախկին տնօրեն Մայք Պոմպեոյի դեմ մահափորձի համար։ Այս մասին հայտնել է CNN-ը։
Ենթադրվում է, որ «այս դավադրությունը, հավանաբար, վրեժ էր» 2020 թվականի հունվարին ամերիկացիների կողմից կորպուսի առաջնորդ Ղասեմ Սոլեյմանիի սպանության համար։ Դատախազները հայտնել են, որ Իրանի քաղաքացի 45-ամյա Փուրսաֆին փորձել է 300 հազար դոլար վճարել ինչ-որ ամերիկացու՝ Բոլթոնի սպանության համար և ասել, որ նա «երկրորդ աշխատանք» ունի՝ 1 միլիոն դոլարով: Դա կարող էր լինել Պոմպեոյի դեմ մահափորձը։
Հեռուստաալիքի աղբյուրների համաձայն՝ Արդարադատության նախարարությունը նախկին պետքարտուղարին հայտնել է, որ սպանության դավադրության թիրախներից մեկն է եղել։
Փուրսաֆին խոստովանել է, որ մարդասպանին վարձելու համար կապ է հաստատել ԱՄՆ-ում գտնվող մի մարդու հետ, որը գաղտնի աշխատել է որպես ԿՀՎ-ի տեղեկատու։ Իրանցին հետաքրքրվել է նրանից, թե կարո՞ղ է, արդյոք, մարդ վարձել, որպեսզի «որոշներին վերացնեն»՝ նկատի ունենալով Բոլթոնին։
Փուրսաֆիին մեղադրանք է առաջադրվել «միջպետական առևտրի միջոցով վարձու սպանություն կատարելու համար», որը ենթադրում է մինչև 10 տարվա ազատազրկում և «անդրազգային սպանության դավադրությանը նյութական աջակցություն ցուցաբերելու համար», ինչի համար նա կարող է դատապարտվել 15 տարվա ազատազրկման։
Իր հերթին, Բոլթոնը CNN-ին հայտնել է, որ «վրդովված է այն ցածր գնից», որն իբրև առաջարկվել է իր սպանության համար։
Հիշեցնենք, որ 2020 թվականի հունվարի 3-ին ԱՄՆ-ը Բաղդադի օդանավակայանում ոչնչացրել է իրանցի գեներալ Ղասեմ Սոլեյմանիին: Այնուհետև ԱՄՆ նախագահ Դոնալդ Թրամփը հայտարարել է, որ Սոլեյմանին հարձակումներ է նախապատրաստում ԱՄՆ չորս դեսպանատների վրա։ Ի պատասխան՝ հունվարի 8-ին Իրանը հրթիռներ է արձակել Իրաքում գտնվող ԱՄՆ երկու բազաների ուղղությամբ, որտեղ տեղակայված է ամերիկյան ռազմական կոնտինգենտը։ Իրանում այս հարվածն անվանեցին «վրեժ Սոլեյմանիի սպանության համարվ։
Ավելի ուշ Իրանը կազմել է 48 հոգուց բաղկացած ցուցակ, որոնք, ենթադրաբար, ներգրավված են Սոլեյմանիի սպանության գործում։
Տաթև Ֆռանգյան
