Քաղաքականություն
10.08.2022 | 16:42
Եվս երկու նավ, որոնք հացահատիկ և պարենամթերք են տեղափոխում, լքել են Ուկրաինան։ Այս մասին հայտնել են Ուկրաինայի Ենթակառուցվածքների նախարարությունից, գրում է VOA-ն։
Նավերը Սև ծովով պետք է անցնեն Բոսֆորը՝ Ռուսաստանի հետ ուկրաինական նավահանգիստներով գյուղմթերքի արտահանումը հեշտացնելու համաձայնագրի համաձայն։
Նախարարությունը ֆեյսբուքյան իր էջում հայտնել է, որ Օդեսայից հարավ գտնվող Չեռնոմորսկից երկու նավ է մեկնել՝ ընդհանուր 70 հազար տոննա հացահատիկով և պարենով բեռնված։
Զեկույցում ասվում է, որ մի նավը՝ Ռահմի Յագգին, 5300 տոննա պարեն կմատակարարի Թուրքիա, իսկ մյուսը՝ Ocean Lion-ը, մոտ 65,000 տոննա եգիպտացորեն կտեղափոխի Հարավային Կորեա։
Ընդհանուր առմամբ, 12 նավ է մեկնել Սև ծովի երեք տարբեր ուկրաինական նավահանգիստներից՝ համաձայն հուլիսին Ռուսաստանի և Ուկրաինայի միջև ՄԱԿ-ի և Թուրքիայի միջնորդությամբ ձեռք բերված պայմանավորվածության:
Տաթև Ֆռանգյան
