Բայրամովը խոստովանել է, որ Ադրբեջանի ԶՈՒ-ի հարձակման նպատակն Արցախի ՊԲ-ի չեզոքացումն է

Ադրբեջանի ԱԳ նախարար Ջեյհուն Բայրամովը թուրքական լրատվամիջոցներին տված հարցազրույցում հերթական անգամ հանդես է եկել քարոզչական հայտարարություններով ու կեղծ պնդումներով։

Մասնավորապես, նա նշել է, որ Հայաստանը, իբր, պետք է դադարեցնի «սադրանքներն ու կատարի իր պարտավորությունը»։ Բայրամովը, միաժամանակ, խոստովանել է, որ օգոստոսի 3-ին Ադրբեջանի ԶՈՒ-ն հարձակվել է Արցախի վրա՝ խախտելով նոյեմբերի 9-ի եռակողմ հայտարարությունը։

«Պարտավորություններ ասելով՝ նկատի ունեմ, որ Հայաստանի Զինված ուժերը դեռ գտնվում են Ղարաբաղում։ Եռակողմ հայտարարության համաձայն՝ Հայաստանը նման պարտավորություն է ստանձնել։ Հայկական զինված ուժերը պետք է դուրս գային, երբ տարածաշրջան մտան խաղաղապահ ուժերը, սակայն նրանք դեռ գտնվում են այնտեղ և հերթական անգամ սադրանք են իրականացրել, որի հետևանքով զոհվել է մեր զինծառայողը։ Դրան ի պատասխան՝ ադրբեջանական զինուժը սկսել է «Հատուցում» գործողությունը, և հակառակորդին ավերիչ հարվածներ են հասցվել։ Միջնորդների դիմումի շնորհիվ այդ գործողությունը դադարեցվեց օգոստոսի 3-ի երեկոյան»,- ասել է Բայրամովը։

Հատկանշական է, որ Բայրամովը խոսում է եռակողմ հայտարարության պարտավորություններից, մինչդեռ Բաքուն ինքը  չի կատարում՝ շարունակաբար խախտելով դրանք։

Հավելենք, որ Արցախում ՀՀ ԶՈՒ-ն որևէ ստորաբաժանում չունի, Արցախի անվտանգությունն ապահավում է Պաշտպանության բանակը, որի չեզոքացման մասին եռակողմ հայտարարության մեջ որևէ դրույթ չկա։

Խոսելով, իբր, Արցախում առկա Հայաստանի Զինված ուժերի մասին՝ Բայրամովն ասել է նաև, որ «Հատուցում» գործողությունն ուղղված է եղել Ադրբեջանում «ապօրինի հայկական կազմավորումների դեմ»։

Էմմա Չոբանյան