Սոչիում կայացած Պուտին-Էրդողան հանդիպումից հետո ԱՄՆ-ը հսկում է Թուրքիայի ու ՌԴ-ի դրամական շրջանառությունը

Օգոստոսի 5-ին Սոչիում կայացած Թուրքիայի նախագահ Ռեջեփ Թայիփ Էրդողանի և ՌԴ նախագահ Վլադիմիր Պուտինի հանդիպումից հետո ԱՄՆ Պետքարտուղարությունն ասել է, որ սերտորեն հետևում են երկու երկրների միջև դրամական շրջանառությանը և դեռ անօրինականության ապացույցներ չեն գտել Թուրքիայում ռուսական փողերի հետ կապված։ Այս մասին գրում է Bloomberg-ը, որին վկայակոչում է Turkish Minute-ը։

Սոչիում կայացած գագաթնաժողովից հետո համատեղ հայտարարության մեջ, որը խոստանում էր ավելի խորը տնտեսական համագործակցություն, երկու ղեկավարներն ընդգծել են իրենց երկրների միջև հարաբերությունների վստահության առանցքային դերը տարածաշրջանային և միջազգային կայունության համար և խոստացել մեծացնել համագործակցությունն առևտրի ու էներգետիկայի ոլորտներում:

Ռուսաստանի և Թուրքիայի միջև նոր տնտեսական համաձայնագրերին ԱՄՆ-ի առաջին արձագանքը Պետքարտուղարության գրավոր պատասխանն է Bloomberg HT-ի հարցերին։

«Ցանկանում ենք հիշեցնել, որ Թուրքիան ուժեղ աջակցություն է հայտնել Ուկրաինայի ինքնիշխանությանն ու տարածքային ամբողջականությանը ռուսական ագրեսիայի պայմաններում, իսկ նախագահ Էրդողանը Ռուսաստանի գործողությունները անվանել է «անընդունելի»»,- ասվում է հայտարարության մեջ։

Նշվում է նաև, որ կոչ են արել Թուրքիային՝ չդառնալ ապահով ապաստան ռուսական ակտիվների կամ փոխանցումների համար։

«Մենք ուշադիր հետևում ենք  տվյալներին, և մինչ այժմ, կարծես թե, Թուրքիայում ապօրինի ռուսական փողերի մասին որևէ ապացույց չկա»,- ասվում է Պետքարտուղարության հայտարարության մեջ։

Էմմա Չոբանյան