Չինաստանը նոր զորավարժություններ է անցկացնում Թայվանի մոտ

Չինացի զինվորականներն օգոստոսի 8-ին հայտարարել են Թայվանի մոտ նոր վարժանքների մեկնարկի մասին։ Այս մասին հայտնում է Bloomberg-ը։

Նշվում է, որ այս կերպ Պեկինն ազդարարում է կղզու վրա շարունակվող ճնշման մասին՝ ԱՄՆ Կոնգրեսի Ներկայացուցիչների պալատի խոսնակ Նենսի Փելոսիի այցից անմիջապես հետո հայտարարված զորավարժությունների շարքից հետո։

Չինաստանի Ժողովրդական ազատագրական բանակի (PLA) Արևելյան հրամանատարությունը հայտարարության մեջ նշել է, որ զինվորականներն իրականացրել են հակասուզանավային գործողություններ և օդային-ծովային հարվածներ «Թայվան կղզու օդային և ծովային տարածքում»: Տարածաշրջանային շտաբը չի հստակեցրել, թե որտեղ են անցկացվել զորավարժությունները կամ արդյո՞ք դրանք մաս են կազմում Թայվանի շուրջ չորսօրյա աննախադեպ զորավարժությունների, որոնք պետք է ավարտվեին կիրակի:

Թայվանի Պաշտպանության նախարարությունը հայտնել է, որ երկուշաբթի կղզու շրջակայքում նկատվել են չինական ռազմական ինքնաթիռներ և նավեր: Այնուամենայնիվ, Չինաստանը մինչ այժմ որևէ նոր նավիգացիոն նախազգուշացում չի տվել կղզու մոտ ուղիղ կրակով վարժանքների մասին, իսկ օգոստոսի 8-ին նկատվել են տարածաշրջանում նավագնացության և օդային հաղորդակցության վերականգնման նշաններ։

Հիշեցնենք, որ օգոստոսի 7-ին PLA-ն հայտարարեց, որ վարժանքներ է անցկացրել Թայվանի շրջակայքում, որոնք ուղղված են եղել ցամաքում և օդում հեռահար հարվածների հնարավորությունների փորձարկմանը:

Տաթև Ֆռանգյան