Գազայում զինյալները համաձայնել են հրադադարին. Իսրայելը հայտարարել է, որ գործողության նպատակները կատարվել են

«Իսլամական ջիհադի» զինյալները կիրակի ուշ երեկոյան հայտարարել են, որ համաձայնել են Եգիպտոսի միջնորդությամբ զինադադարին՝ վերջ դնելու Իսրայելի հետ եռօրյա հակամարտությանը, որի հետևանքով զոհվել է ավելի քան 40 մարդ, գրում է BBC-ի ռուսական ծառայությունը:

Իսրայելի իշխանությունները նույնպես հաստատել են, որ զինադադարը համաձայնեցվել է, սակայն ընդգծել են, որ պատրաստ են ուժ կիրառել, եթե հրադադարը խախտվի։

Զինադադարն ուժի մեջ է մտել տեղական ժամանակով 23:30-ին (20:30 GMT): Նախապես նախատեսված էր այն սկսել ժամը 20:00-ին։

«Եգիպտական զինադադարի համաձայնագրի ձևակերպումը համաձայնեցված է, որը պարունակում է Եգիպտոսի պարտավորությունը՝ աշխատելու երկու բանտարկյալների՝ [Բասեմ] ալ-Սաադիի և [Խալիլ] Ավաուդեի ազատ արձակման ուղղությամբ»,- ասել է «Իսլամական ջիհադի» խոսնակ Մոհամմադ ալ-Հինդին:

Սաադին՝ «Իսլամական ջիհադի» քաղաքական թևի բարձրաստիճան անդամներից մեկը, վերջերս ձերբակալվել է օկուպացված Արևմտյան ափում. Ավաուդեն, որը խմբավորման անդամ է, նույնպես կալանավորված է Իսրայելում։

Իսրայելի վարչապետ Յաիր Լապիդն իր հերթին հայտարարել է, որ Գազայի հատվածում գործողության նպատակներն իրականացվել են, և այն շարունակելն իմաստ չունի։ Գազայի հատվածում այս օրերի իրավիճակի սրումն ամենալուրջն է 2021 թվականի մայիսից ի վեր։

Ավելի վաղ Իսրայելի պաշտպանության նախարարության ղեկավար Բենի Հանցը հայտարարել էր, որ Գազայում «Արշալույսին» կոչվող գործողությունը կարող է տևել ևս մեկ շաբաթ։

«Մենք խոցել ենք տասնյակ ռազմական թիրախներ, որոնք «Իսլամական ջիհադն» օգտագործել է հրթիռներ արտադրելու և արձակելու համար: «Երկաթե գմբեթ» հակահրթիռային պաշտպանության համակարգի վրա աշխատող զինվորները, որոնց հետ ես այսօր այստեղ եմ, կշարունակեն պաշտպանել հայրենիքը՝ իրենց հայացքը պահելով թիրախների վրա»,- ասել է նա։

Իսրայելի պաշտանության բանակը նախօրեին հայտարարել է, որ 26 թիրախները խոցելու համար կիրառվել է 16 տոննա հրթիռ ու ավիառումբ։

Տաթև Ֆռանգյան