Ավետիք Չալաբյանը կրկին կալանավորվեց

Երևանի ընդհանուր իրավասության դատարանի Կենտրոնի նստավայրում այսօր՝ օգոստոսի 3-ին, դատավոր Մնացական Մարտիրոսյանի որոշմամբ հասարակական-քաղաքական գործիչ Ավետիք Չալաբյանը կրկին կալանավորվեց, այս անգամ՝ երեք ամսով։

Չալաբյանի պաշտպան Վարազդատ Հարությունյանը այդ որոշումը որակեց ապօրինի. «Մեր կողմից մատնանշված որևէ հիմնավորման դատարանը չանդրադարձավ: Ինչո՞ւ դատարանը հաշվի չի առել, որ այս ընթացքում Ավետիք Չալաբյանի կողմից որևէ խոչընդոտման փաստ չկա»,-ընդգծեց փաստաբանը։

Ինքը՝ Չալաբյանը, դատարանի որոշումը որակեց քաղաքական իշխանությունների կողմից պատվեր․ «Այս դատավորը իրականացնում է Նիկոլ Փաշինյանի և նրա վարչակազմի ուղիղ պատվերը»,- հայտարարեց նա։

Հիշեցնենք՝ օգոստոսի 1-ի նիստում Չալաբյանի պաշտպանները դատավոր Մարտիրոսյանին ինքնաբացարկի միջնորդություն էին ներկայացրել, որը մերժվել էր։

Ավետիք Չալաբյանը մայիսի 14-ին կալանավորվել էր, ապա կալանքը երկարացվել էր ևս 15 օրով։ Հուլիսի 27-ի երեկոյան ազատ էր արձակվել «Արմավիր» քրեակատարողական հիմնարկից։

Հիշեցնենք, որ Չալաբյանը մեղադրվում է ընդդիմության ցույցերին մասնակցելու նպատակով Հայաստանի ազգային ագրարային համալսարանի ուսանողներին նյութապես շահագրգռելու մեջ։
«Ավետիք Չալաբյանին մեղադրանք է առաջադրվել այն բանի համար, որ նա 2022 թվականի մայիսի 4-ին Երևան քաղաքի Աբովյան 12 հասցեում գտնվող՝ «Դալան» ռեստորանում, այնուհետև մայիսի 08-ին՝ Հայաստանի ազգային ագրարային համալսարանի ուսանողական խորհրդի սենյակում նշված համալսարանի ուսանողական խորհրդի նախագահ Թոռնիկ Ալիյանին և նրա միջոցով Հայաստանի ազգային ագրարային համալսարանի ուսանողական խորհրդի անդամներին ու համալսարանի ուսանողներին ՀՀ-ում «Դիմադրություն» և «Համախմբում» շարժումների հավաքներին՝ անհնազանդություններ, բողոքի ակցիաներին, ցույցերին, փողոցներ փակելու գործողություններին մասնակցելու նպատակով դիտավորությամբ նյութապես շահագրգռել է՝ առաջարկելով 2.000.000

ՀՀ դրամ գումար»,- ասված է մեղադրական եզրակացության մեջ։

Արփի Հակոբյան