«Քաղաքական կամքի առկայության պարագայում հնարավոր է ստվերից եկամտային մաս բերել տարեկան մոտ 180 մլն դոլար». Արտակ Մանուկյան. ՏԵՍԱՆՅՈՒԹ

Տնտեսագետ Արտակ Մանուկյանը Factor.am-ի հետ զրույցում անդրադառնալով ՀՀ նոր կառավարության կազմին և հանրության տնտեսական ակնկալիքներին, նշում է, որ քաղաքական կամքի առկայության պարագայում հնարավոր է ստվերից եկամտային մաս բերել մոտ 180 մլն դոլար: Իսկ նման քաղաքական կամք, ըստ տնտեսագետի, առկա է ՀՀ նոր կառավարության մոտ: Ինչ վերաբերում է տնտեսության ռազմավարության փոփոխություններին, ըստ Մանուկյանի, դրանք պետք է ակնկալենք հաջորդ տարվա պետական բյուջեով: Այս պահին կարելի է ակնկալել ստվերի կրճատում և հարկային հավաքագրումների ավելի մեծ տեմպեր:

«Այս կառավորությունն ունի շատ կարևոր գործոն, որը տնտեսագիտության մեջ կոչվում է սոցիալական կապիտալ: Դա այն է, որ հանրությունը պատրաստ է համագործակցել և վստահություն ունի կառավարության իրականացրած քայլերի նկատմամբ: Սա շատ կարևոր կապիտալ է և արդի տեսությունները սրանով են պայմանավորում տնտեսական աճի հնարավորությունը»: Անդրադառնալով պետգնումների ոլորտին, տնտեսագետը կարևոր է համարում, որ մինչ այժմ կայացած մրցույթներն ու դրանց մասնակիցները ուսումնասիրվեն ու չարաշահումներ թույլ տվողները պատասխան տան, իսկ մսխված գումարները վերադարձնեն բյուջե:

«Եթե պատասխան չեն տալու, մենք շուկայի արհեստական խեղումները չենք լուծում: Կունենանք պետգնումների տեսանկյունից թղթերով, ամեն ինչով պուպուշ մրցույթ, բայց հաղթողը կլինի նույն մարդը, որը, ըստ էության, մրցակցությունից զերծ կմնա»,-բացատրեց տնտեսագետը՝ հավելելով, թե շատ կարևոր է, որ ուսումնասիրվի համեմատական առավելություն ունեցող բուրգը չարաշահումներո՞վ է ստեղծվել, թե՞ ոչ: «Հակառակ դեպքում, որևէ նոր խաղացողի ի հայտ գալը, հատկապես ՓՄՁ սուբյեկտների դեպքում, շատ դժվար է ակնկալել»,- ասաց տնտեսագետը՝ շեշտելով, որ տարիներ շարունակ որոշ պաշտոնյաներ պետգնումների համակարգով կերկարվել են և ոչնչացրել բոլոր մրցակիցներին:

Արտակ Մանուկյանն օրերս Factor.am-ի հետ զրույցում ահազանգել էր, որ Սերժ Սարգսյանի հրաժարականի օրը «ԻնգոԱրմենիայի» հետ կասկածելի պայմանագիր է կնքվել, ինչի հետ կապված հիմնադրամը պարզաբանում էր ներկայացրել՝ նշելով, թե պայմանագիրը չի հրապարակվել գաղտիության մասին հոդվածի հիմքով, իսկ ժամկետների առումով տեխնիկական վրիպակ է տեղի ունեցել։ Տնտեսագետը, հղում կատարելով «Գնումների մասին օրենքին», ասաց, որ «օրենքի պահանջով պետք է հակիրճ տեղեկություն լինի կնքված պայմանագրի մասին»: Բացառություն են միայն պետական գաղտնիք պարունակող տեղեկությունները։ Բացի դա, ըստ նրա, պայմանագիրը կնքվել է մեկ անձի հետ, ինչը կարող է կոռուպցիոն ռիսկեր պարունակող գործարքների շարքում դիտվել»:

Մանրամասները դիտեք Արտակ Մանուկյանի հետ Factor.am-ի հարցազրույցում:

Մարինե Խառատյան