16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Ոստիկանապետը Փաշինյանին ենթակա չի լինի. նոր նախարարություն է ստեղծվում․ ՏԵՍԱՆՅՈՒԹ
Քաղաքականություն
29.07.2022 | 20:39
Հայաստանի իշխանությունների օրակարգում է երեք խոշոր կառույցների՝ Արտակարգ իրավիճակների նախարարության, Ոստիկանության ու Միգրացիոն ծառայության միավորմամբ Ներքին գործերի նախարարության ստեղծումը։ Նոր նախարարություն ստեղծելու անհրաժեշտությունը կառավարությունում հիմանավորում են ավելի արդյունավետ և փոխլրացնող կառավարում ունենալու հրամայականով։
Ոստիկանությունն այժմ վարչապետին ենթակա մարմին է։ Վարչապետի առաջարկությամբ ՀՀ նախագահը նշանակում կամ ազատում է ոստիկանապետին։ Առաջարկվող փոփոխություններով ձևավորվելիք ՆԳՆ-ի կազմում ոստիկանապետին ու փրկարար ծառայության ղեկավարին, նախարարի առաջարկությամբ, նշանակելու է վարչապետը։ Ոստիկանապետն ու փրկարար ծառայության պետը նաև նախարարի տեղակալների կարգավիճակ են ունենալու։ ՆԳՆ-ի կազմում ոստիկանությունը դառնում է խորհրդարանին հաշվետու մարմին։
Իրավապաշտպան Արթուր Սաքունցը կարծում է՝ ոստիկանապետի նշանակումը պետք է այնպիսի ընթացակարգով արվի, որ հանրության շրջանում պաշտոնյայի նկատմամբ վստահություն լինի։
Ոստիկանությունն ու ԱԱԾ-ն, երբ 2015 թվականի սահմանադրական փոփոխություններով դարձան վարչապետին ենթակա մարմին, քննադատություն հնչեց սուպերվարչապետական համակարգի ներդրման առնչությամբ։ ՄԻՊ-ի խոսքով՝ ոստիկանությունը ՆԳՆ-ի կազմում առավել չեզոք կլինի։ Քրիստիննե Գրիգորյանի կարծիքով՝ ՆԳՆ-ի ստեղծումը կնպաստի, որ ոստիկանությունը կենտրոնանա իր հիմնական գործառույթի վրա և չտրվի քաղաքական ճնշումներին։
Ներքին գործերի նախարարություն ստեղծելու օրենսդրական փաթեթը դեռ քննարկման փուլում է։ Հանրային լսումներից և առաջարկություններից հետո պետք է ներկայացնեն Ազգային ժողովի քննարկմանը։ Այն խորհրդարանի օրակարգում կլինի հավանաբար աշնանային նստաշրջանում։ Թե ՆԳՆ-ն որքանով արդյունավետ կլինի՝ ժամանակը ցույց կտա, սակայն, նշենք, որ պետական կառավարման համակարգում այն նորություն չէ։ Հայաստանի Հանրապետությունն անկախությունից հետո ՆԳ-ն ունեցել է և այն գործել է մինչև 2003 թվականի հունվարի 1-ը, որից հետո կառույցը վերաձևավորվեց Ոստիկանության։ Այսպիսով՝ 20 տարվա ընդմիջումից հետո գերատեսչությունը դարձյալ տեղ կգտնի կառավարությունում, սակայն նոր բովանդակությամբ։
Մանրամասները՝ տեսանյութում։
Նարեկ Կիրակոսյան
