20.11.2024 | 15:32
Վեդիի Նոր Կյանք բնակավայրում տեղադրվել է լուսանկարահանող սարք
«Ո՛չ բռնապետությանը», «Բացե՛ք սահմանները»․ Բաքվում ոստիկանները ուժով ցրել են կառավարության շենքի մոտ անցկացված բողոքի ցույցը․ ԼՈՒՍԱՆԿԱՐՆԵՐ
Քաղաքականություն
20.07.2022 | 15:26
Բաքվում կառավարության շենքի մոտ մի խումբ ադրբեջանցիներ բողոքի ակցիա են անցկացրել երկրի ցամաքային սահմանները բացելու պահանջով, գրում են տեղական լրատվամիջոցները։ Ակցիայի կազմակերպիչն է ընդդիմադիր դեմոկրատական ուժերի Ազգայի խորհրդի ու «Մուսավաթ» կուսակցության անդամ Թոֆիգ Յագուբլուն։
Ակցիան նախատեսված է եղել տեղական ժամանակով 12:00-ին, սակայն արդեն ժամը 11:30-ից ոստիկանության ուժեղացված ջոկատների կողմից փակվել է շենքի անցումը։ Միաժամանակ ոստիկանները սկսել են հարակից փողոցներից ուժով հետ մղել ակցիայի մասնակիցներին։ Վրդովված ցուցարարներն իրենց դժգոհությունն են հայտնել լրագրողների հետ հարցազրույցներում։
«Ինչու՞ են սահմանները փակ պահում։ Ավիատոմսերը շատ թանկ են, մենք չենք կարող մեր հիվանդներին տանել արտասահման բուժման։ Ո՛չ բռնապետությանը, մենք ժողովրդավարություն ենք ուզում»,- լրագրողներին ասել է միջին տարիքի մի կին։
Ակցիայի մեկ այլ մասնակից էլ քննադատել է կառավարության սոցիալական քաղաքականությունը. «300 մանաթ (180 դոլար) աշխատավարձ են տալիս, դա աշխատավարձ չէ՝ ողորմություն է»,- ասել է նա։
Մեկ այլ կին վրդովմունք է հայտնել ոստիկանների գործողություններից.
«Ոստիկանությունը ժողովրդի կողքին չէ, նրանք պաշտպանում են իշխող ընտանիքին»։
Ձերբակալվածների թվում են կանայք, տարեցներ, ինչպես նաև պատերազմի մասնակիցներ։ Առաջինը ձերբակալվել է Թոֆիգ Յագուբլուն։
Կառավարության շենքի մոտից հետ մղված 40-50 հոգանոց խումբը շարունակել է ակցիան՝ վանկարկելով՝ «Հրաժարական»։ Նախնական տվյալներով՝ մոտ 25 մարդ է ձերբակալվել։
Հավելենք, որ հուլիսի 1-ից Ադրբեջանը փակել է իր ցամաքային սահմանները Թուքիայի ու Իրանի հետ, որն առաջացրել է քաղաքացիների դժոգոհությունը, քանի որ ավիատոմսերը շատ թանկ են՝արտերկիր մեկնելու համար։ Դեռ 2020թ-ի մարտից էլ փակ են ՌԴ-ի ու Վրաստանի հետ ցամաքային սահմանները։
Էմմա Չոբանյան
