19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Բանտարկված քուրդ քաղաքական գործիչ Դեմիրթաշը հայտարարել է,որ կցանկանար PKK-ն ամբողջությամբ զինաթափվեր
Քաղաքականություն
20.07.2022 | 11:19
Թուրքիայի Ժողովուրդների դեմոկրատական կուսակցության (HDP) նախկին համանախագահ, բանտարկված Սելահեթթին Դեմիրթաշն ուշագրավ հայտարարություն է արել։ T24 լրատվամիջոցին տված հարցազրույցում նա նշել է, որ ցանկանում է՝ Քրդստանի աշխատավորական կուսակցությունը (PKK) լիովին զինաթափվի և հրաժարվի թուրքական պետության դեմ իր զինված պայքարից, գրում են թուրքական լրատվամիջոցները , սակայն, ըստ Դեմիրթաշի, դրա համար երկու հիմնական խոչընդոտ կա։
«HDP-ն PKK-ի շարունակությունը, աջակիցը կամ խոսափողը չէ և նրա հետ կապ չունի։ Մենք կարիք ունենք դա բացատրելու թուրքական հանրությանը։ Ժողովրդավարական քաղաքականություն վարող կուսակցությունը չի կարող կապ ունենալ զինված կազմակերպության հետ»,- ասել է Դեմիրթաշը։
Նա նաև նշել է, որ իր կուսակցության մոտեցումը քրդական հարցի լուծման առումով ամենաիրատեսականն է մյուս քաղաքական կուսակցությունների համեմատ և հիմնված է «երկխոսության և բանակցությունների» վրա՝ «ռազմական գործողության» փոխարեն։ Ըստ նրա՝ քրդական հարցը չի կարող լուծվել հողի վրա, որը պարունակում է բռնություն, այդ պատճառով PKK-ն պետք է վայր դնի զենքերը։
«Երկուսն էլ՝ և՛ պետությունը, և՛ PKK-ն պետք է քրդական խնդիրը հանեն բռնության դաշտից։ Ես կցանկանայի, որ PKK-ն լռի և հրաժարվի զենքից, եթե դա հնարավոր է։ Բայց կա երկու հիմնական խոչընդոտ, և բոլորը պետք է իմանան դրանց մասին»,-ասել է Դեմիրթաշը։
Ըստ նրա՝ առաջին խոչընդոտն այն է, որ կառավարությունը չի դիտարկում և չի քննարկում լուծման այլ տարբերակ, բացի ռազմական գործողությունից։ Երկրորդ խոչընդոտն էլ PKK-ի առաջնորդ Աբդուլլահ Օջալանի շարունակվող ազատազրկումն է։
«Օջալանն այն մարդն է, որը կարող է համոզել PKK-ին. և նրան տարիներ շարունակ մեկուսացման մեջ են պահում։ Ես ուրախ կլինեմ, եթե PKK-ն լռեցնի իր զենքերը ՝ չնայած այս խոչընդոտներին։ Սակայն մեր նախորդ փորձը , ցավոք, ցույց է տվել, որ դա հեշտ չի եղել»,- ասել է Դեմիրթաշը:
Հավելենք, որ քաղաքական գործիչը բանտում է 2016թ-ից։ PKK-ի հետ կապված մեղադրանքներով նրան սպառնում է ցմահ ազատազրկում: Մինչդեռ ՄԻԵԴ-ի վճիռ կա, ըստ որի՝ Դեմիրթաշը բանտարկվել է քաղաքական դրդապատճառներով և պետք է անհապաղ ազատ արձակվի։
Էմմա Չոբանյան
