30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Բոբ Մենենդեսը հայտնել է, որ շարունակում է դեմ լինել Թուրքիային F-16-եր վաճառելուն
Քաղաքականություն
14.07.2022 | 20:03
ԱՄՆ Սենատի արտաքին հարաբերությունների հանձնաժողովի նախագահ, դեմոկրատ Բոբ Մենենդեսը, որը ներկայացնում է Նյու Ջերսի նահանգը, հայտարարել է, որ չի մտածում Թուրքիային նոր F-16 կործանիչներ վաճառելու դեմ իր առարկություններից հրաժարվելու մասին, հայտնում է Politico-ն, որին վկայակոչում է Turkish Minute-ը։ Մենենդեսը որպես դեմ արտահայտվելու պատճառ նշում է մարդու իրավունքների հետ կապված մտահոգությունները։ Նա թեմային դարձյալ անդրադարձել է այն բանից հետո, երբ Պետքարտուղարությունը ծանուցել է Կոնգրեսին, որ մտադիր է ռազմական տեխնիկա վաճառել Թուրքիային։
Մադրիդում կայացած ՆԱՏՕ-ի գագաթնաժողովում էլ ԱՄՆ նախագահ Ջո Բայդենը հայտարարել էր, որ Վաշինգտոնն աջակցում է Թուրքիային F-16 կործանիչների վաճառքին և վստահ է, որ կարող է ստանալ Կոնգրեսի համաձայնությունը, որն անհրաժեշտ է վաճառքի համար։
Նշվում է, որ Մենենդեսը վետոյի իրավունք ունի F-16 կործանիչների վաճառքի հարցում և եթե նա ու հանրապետական սենատոր Ջիմ Ռիշը չստորագրեն փաստաթուղթը, Բայդենի վարչակազմը չի կարողանա F-16-երը վաճառել Թուրքիային:
«Մնում է տեսնել, թե արդյոք Սպիտակ տունը կփորձի ճնշել Մենենդեսին կամ Ռիշին այդ հարցում», – գրում է լրատվամիջոցը։
ԱՄՆ 35 կոնգրեսականներ նախագահ Բայդենին ուղղված նամակում զգուշացրել են, որ պատրաստ են ձեռնարկել բոլոր գործողությունները՝ արգելափակելու F-16 կործանիչների և արդիականացման սարքավորումների վաճառքը Թուրքիային:
Էմմա Չոբանյան
