Կանգնեցնե՞լ Հիսուս Քրիստոսի արձանը, թե՝ ոչ. Գագիկ Ծառուկյանի քայլը՝ քննադատության թիրախ․ ՔՆՆԱՐԿՈՒՄ

Քրիստոնեությունն առաջինը պետականորեն ընդունած Հայաստանում պե՞տք է կանգնեցնել Հիսուս Քրիստոսի մեծ արձանը, թե՞ ոչ․ այս հարցը դարձել է հանրային լայն քննարկման առարկա։ Արձանի տեղադրման նախաձեռնությունը գործարար, ԲՀԿ ղեկավար Գագիկ Ծառուկյանինն է, իսկ Հայաստանի կառավարությունը դրական կարծիք է հայտնել։ Նիկոլ Փաշինյանը հույս ունի, որ արձանը կմեծացնի զբոսաշրջային հետաքրքրությունը Հայաստանի նկատմամբ։

Քաղհասարակությունը, սակայն, ահազանգում է․ Հատիս լեռը ընդգրկված է ՀՀ բնության հուշարձանների ցանկում, իսկ ըստ «Բնության հատուկ պահպանվող տարածքների մասին» ՀՀ օրենքի՝ բնության հուշարձանի տարածքում արգելվում է ցանկացած գործունեություն, ինչը սպառնում է դրա պահպանությանը։ Շրջակա միջավայրի նախարարությունը հայտնել է, որ շինարարությունը կասեցված է, շինաշխատանքները կմեկնարկեն միայն պետական մարմինների կողմից մասնագիտական և փորձաքննական եզրակացություններն ու թույլտվություններն ստանալուց հետո։

Տեղադրե՞լ Հիսուս Քրիստոսի արձանը, թե՝ ոչ, եթե այո՝ ապա որտե՞ղ։  Factor TV-ում այս թեմայի շուրջ քննարկմանը մասնակցում են «Ժողովրդավարական հարթակ» հիմնադրամի ղեկավար Գարեգին Միսկարյանը,  «Անտարես» մեդիահոլդինգի տնօրեն Արմեն Մարտիրոսյանը և ճարտարապետ, մշակույթի նախկին փոխնախարար  Տիգրան Գալստյանը։ Factor TV-ն քննարկման հրավերով դիմել էր նաև Գագիկ Ծառուկյանի ներկայացուցիչներին, քաղաքական թիմակիցներին, Հիսուսի արձանի տեղադրմամբ զբաղվող հանձնախմբին, սակայն մեզ տեղեկացրին, որ այս փուլում չեն ցանկանում այս հարցով դիսկուրսի մեջ մտնել և մասնակցել հանրային քննարկումների։