Թուրքիան կործանիչ է մշակում․ շարժիչի համար մրցույթ է հայտարարվել

Թուրքիայի պաշտպանական գնումների գործակալությունը (SSB) մրցույթ է հայտարարել տեղական ընկերությունների  համար, որպեսզի շարժիչներ մատակարարեն տեղական արտադրության TF-X կործանիչի համար,  հայտնում  է Defense News-ը։

SSB-ն առաջարկների դիմում է ներկայացրել հունիսին և նշել է, որ երկու արտադրողներ՝ պետական  բաժնետիրական Tusas Engine Industries և TRMotor ընկերությունները արձագանքել են։  Գործակալության ղեկավար Իսմայիլ Դեմիրը ասել է, որ շուտով մտադիր է հայտ ներկայացնել նաև TAEC-ը՝ Rolls-Royce-ի և թուրքական Kale Group-ի համագործակցությունը:

Դեմիրն ասել է, որ TAEC-ի առաջարկը համապատասխանում է հայտի բոլոր չափանիշներին, բացառությամբ մեկի՝ Թուրքիայի մտավոր սեփականության իրավունքին։

«Այն դեպքում, եթե մենք  չհամաձայնվենք Rolls-Royce-ի հետ գործարքի շուրջ, Թուրքիան առաջ կգնա իր տեղական հնարավորություններով շարժիչը զարգացնելու համար»,- ասել է նա։

Դեմիրը նշել է, որ գործակալությունը նախատեսում է  TF-X-ի նախատիպերը կառուցել՝ օգտագործելով ԱՄՆ արտադրության F110 շարժիչը: Սակայն TF-X-ը F110 շարժիչով  դժվար կլինի լիարժեք շահագործել, Defense News-ին հայտնել է ոլորտի բարձրաստիճան պաշտոնյան՝ անանունության պայմանով: «Սերիական արտադրությունը կարող է պահանջել հսկայական ներդրումներ և ժամանակ»,-ասել է պաշտոնյան։

Նախատեսվում է, որ TF-X-ն իր առաջին թռիչքը պետք է կատարի 2026 թվականին: Ըստ թուրք պաշտոնյաների՝ այն սերիական արտադրության կդրվի 2029 թվականին:

Էմմա Չոբանյան