21.06.2026 | 02:11
ԱԱ-2026. Գերմանիան կամային հաղթանակի հասավ վերջնամասում. ՏԵՍԱՆՅՈՒԹ
50 տարի սպասել ենք նոր գյուղի կառուցմանը․ Ջրաձորի վարչական ղեկավար
Տնտեսություն
12.07.2022 | 17:00
Ամասիա խոշորացված համայնքի Ջրաձոր գյուղը կտեղափոխվի․ նոր բնակավայրը կառուցվելու է 5 կիլոմետր հեռավորության վրա։ Տեղանքի ընտրությունը համաձայնեցվել է բնակիչների հետ․ Ջրաձորում ավագանու արտագնա նիստ է տեղի ունեցել, գյուղացիներն էլ իրենց կարծիքն են հայտնել ու տվել համաձայնությունը։ Վթարային, կիսաքանդ տների փոխարեն կկառուցվի 69 նոր բնակարան՝ հաշվի առնելով փաստացի բնակվող ընտանիքների քանակը։
Ըստ վարչական ղեկավար Արա Հարությունյանի՝ կառավարությունը գյուղի բոլոր ընտանիքներին բնակարան կտրամադրի, իսկ կից ու օժանդակ կառույցների՝ գոմերի, պահեստների կառուցման համար՝ փոխհատուցում։ Վարչական ղեկավարը նաև պատմեց, որ Խորհրդային տարիներին՝ 70-ական թվականներից սկսած գյուղացիներին խոսք են տվել նոր գյուղ կառուցել, քանի որ տեղում պետք է կառուցվեր Կապսի ջրամաբարը, սակայն խոստումն այդպես էլ չեն կատարել։
Գյուղացիներին նույնիսկ սեփականության վկայական չեն տվել, չեն թույլատրել վերանորոգել տունը կամ կառուցապատել՝ պատճառաբանելով, թե գյուղը պիտի տեղահանվի։ Երկրաշարժից հետո էլ գյուղի տները դարձել են վթարային․ շատերը բնակարային խնդիր ունենալու պատճառով ստիպված լքել են գյուղը, տեղափոխվել Գյումրի, հարակից գյուղեր, նաև՝ Ռուսաստանի Դաշնություն։
«Ռուսաստան տեղափոխվածները խոստանում են վերադառնալ՝ նոր գյուղի կառուցումից հետո։ Հույս ունենք, որ կգան, իսկ նոր գյուղը կլինի մեծ, բարեկեցիկ։ Հայաստանի Հանրապետությունում կլինի միակը, որը կունենա ժամանակակից գյուղի տեսք և, իհարկե, էկոգյուղ կլինի»,- ասում է վարչական ղեկավարը։
Գյուղի կառուցման մասին վարչապետ Նիկոլ Փաշինյանը խոսեկ կառավարության վերջին նիստում՝ հայտարարելով, որ անկախ Հայաստանի պատմության մեջ առաջին անգամ նոր գյուղ կկառուցվի, որտեղ 21-րդ դարի գյուղի մոդել կներդնեն ու քաղաքաշինական նոր կուլտուրա կբերեն։ Կառավարության հաշվարկերով՝ գյուղի տեղափոխման ու նոր գյուղի կառուցման համար 5 միլիարդ դրամ կպահանջվի։
Գյուղի նախնական գլխավոր հատակագիծն արդեն պատրաստ է, շուտով կսկսվեն նախագծային աշխատանքները, որոնք կտևեն 18 ամիս, իսկ բուն շինարարությունը կտևի 2 տարի։
Արմիկ Մովսիսյան
