19.08.2026 | 21:59
Երևանի և 10 մարզի մի շարք հասցեներում էլեկտրաէներգիայի անջատումներ կլինեն
Fitch-ը Թուրքիայի վարկանիշը «B+»-ից իջեցրել է «B»-ի․ կանխատեսումը բացասական է
Քաղաքականություն
11.07.2022 | 20:35
Fitch միջազգային վարկանիշային գործակալությունը իջեցրել է Թուրքիայի արտարժույթի երկարաժամկետ վարկանիշը` «B+»-ից մինչև «B»: Այս մասին ասվում է գործակալության մամուլի հաղորդագրության մեջ, գրում է swissinfo-ն։
Նշվում է, որ վարկանիշի կանխատեսումը բացասական է։
Վարկանիշի նվազեցումը պայմանավորված է Թուրքիայում գնաճի շարունակվող արագացմամբ, ինչպես նաև իշխանությունների քաղաքականությամբ, որը չի նպաստում դրա դանդաղմանը։
«Մենք ակնկալում ենք, որ Թուրքիայում 2022 թվականին միջին գնաճը կկազմի 71,4 տոկոս, որը լինելու է առավելագույնը Fitch-ի վարկանիշով երկրների շարքում, և դրա հետագա հետագիծն անորոշ է»,- ասվում է հաղորդագրությունում։
2023 թվականին, ըստ գործակալության կանխատեսումների, գնաճը Թուրքիայում միջինը կկազմի 57 տոկոս։ Fitch-ի վերլուծաբանները կարծում են, որ երկրի իշխանությունների ընդհանուր քաղաքականությունը խթանող կմնա առնվազն մինչև 2023-ի նախագահական ընտրությունները։
«Քաղաքական նկատառումներից ելնելով՝ թուրքական Կենտրոնական բանկը հիմնական տոկոսադրույքը 2021 թվականի դեկտեմբերից պահպանում է 14 տոկոսի սահմաններում՝ չնայած արագ տեմպերով գնաճին, Ուկրաինայի պատերազմի ազդեցությանը ապրանքային շուկաների վրա և շատ զարգացած երկրների դրամական միջոցների խստացմանը»,- ասվում է հայտարարության մեջ։
Գործակալության փորձագետների համաձայն՝ Թուրքիայի կառավարության կենտրոնացումը տնտեսական բարձր աճի տեմպերի վրա նպաստում է արտարժույթի պահանջարկի ավելացմանը, լիրայի թուլացմանը, միջազգային պահուստների նվազմանն ու երկրում գնաճի արագացմանը։
Էմմա Չոբանյան
