Գերմանիայի ՊՆ ղեկավարը սկսում է ԶՈւ-ի ստուգումները՝ ՆԱՏՕ-ի արևելյան թևում իրավիճակի լարվածության ֆոնին

Գերմանիայի պաշտպանության նախարար Քրիստին Լամբրեխտը Բունդեսվերի (Զինված ուժեր) ստուգում է սկսել, որպեսզի պարզի շտաբերի, զորամասերի ու ստորաբաժանումների օպերատիվ պատրաստվածությունը՝ ՆԱՏՕ-ի արևելյան թևում իրավիճակի լարվածության ֆոնին, գրում է DW-ի ռուսական ծառայությունը։

Dpa գործակալության հաղորդմամբ՝ Լամբրեխտը ստուգումները կսկսի Մյունսթերում (Ներքին Սաքսոնիա) Բունդեսվերի ուսումնական կենտրոն այցով, որի նպատակն է ամրապնդել համագործակցությունը Հյուսիսատլանտյան դաշինքի դաշնակիցների հետ: Աղբյուրի փոխանցմամբ՝ աշխատանքներ են տարվում հաղորդակցությունների գաղտնագրման և տվյալների ավտոմատ փոխանցման առաջադեմ համակարգերի ուղղությամբ։

Նախատեսվում է ՊՆ ղեկավարի այցը Կոլբից-Լեցլինգեր Հիթում (Սաքսոնիա-Անհալթ) մարտական պատրաստության կենտրոն: Այնտեղ Քրիստին Լամբրեխտը կզրուցի զինծառայողների հետ, ովքեր պատրաստվում են մասնակցել Մալիում Բունդեսվերի խաղաղապահ առաքելությանը։

Այս շաբաթվա վերջին նախատեսվում է նաև օբյեկտների ստուգում Լյունեբուրգում և Օլդենբուրգում (Ներքին Սաքսոնիա): Փորձարկումը կավարտվի օգոստոսի 24-ին Մեկլենբուրգ-Պոմերանիայում։

ՆԱՏՕ-ի գլխավոր քարտուղար Յենս Ստոլտենբերգն ավելի վաղ հայտարարել էր, որ ՆԱՏՕ-ն կավելացնի իր արձագանքման ուժերի (NRF) հզորությունը՝ մոտ 40,000-ից հասցնելով 300,000-ի:

Հունիսի 28-30-ը Մադրիդում ՆԱՏՕ-ի գագաթնաժողովի ժամանակ որոշում է կայացվել Սառը պատերազմից ի վեր ուժերի ամենամեծ ռազմական տեղակայման մասին։ Գերմանիան, մասնավորապես, Լիտվայում կղեկավարի 3000-5000-անոց մարտական բրիգադը։

Տաթև Ֆռանգյան