09.10.2026 | 21:43
Ադրբեջանի դպրոցներում հիջաբ կրելու արգելք է սահմանվել նաև ուսուցիչների համար
Կապսի ջրամբարի կառուցման աշխատանքների մեկնարկի համար Կառավարությունը 2022թ․ պետբյուջեում վերաբաշխումներ է կատարել
Քաղաքականություն
11.07.2022 | 15:09
Ռազմավարական կարևոր նշանակության Կապսի ջրամբարի կառուցման աշխատանքների մեկնարկի և «Կապսի ջրամբարի և օժանդակ կառուցվածքների կառուցում» շինարարական աշխատանքների պայմանագրով նախատեսվող կանխավճարի գումարի վճարումն ապահովելու նպատակով ՀՀ Կառավարությունը 2022 թվականի պետական բյուջեում կատարել է վերաբաշխումներ և հատկացրել լրացուցիչ ֆինանսական միջոցներ՝ կանխավճարը հատկացնելու նպատակով։ Այս մասին տեղեկացնում է Շիրակի մարզպետարանը։
««Ոռոգման համակարգի առողջացում» ծրագրի՝ «Գերմանիայի զարգացման վարկերի բանկի աջակցությամբ իրականացվող Ախուրյան գետի ջրային ռեսուրսների ինտեգրված կառավարման ծրագրի շրջանակներում ջրային տնտեսության ենթակառուցվածքների հիմնանորոգում» միջոցառման շրջանակներում, կնքման փուլում է «Կապսի ջրամբարի և օժանդակ կառուցվածքների կառուցում» շինարարական աշխատանքների պայմանագիրը, որի շրջանակներում նախատեսվում է կանխավճարի վճարում՝ միայն վարկային միջոցներից։
Ծրագիրն ընդգրկում է Կապսի պատվարի կայունացում և վերականգնում, առաջին փուլով նախատեսվում է 25 մլն մ3 ծավալով ջրամբարի կառուցում, իսկ հետագայում՝ մինչև 60 մլն մ3: Այն ներառվելու է ջրային ռեսուրսների համատեղված կառավարման շրջանակում, Ախուրյանի գետավազանի ջրային ռեսուրսների առավել կայուն կառավարման ապահովման համար: Կկառուցվի ինքնահոս ոռոգման փակ ցանց, որի արդյունքում մարզում կոռոգվի 8000 հա լրացուցիչ վարելահող, ինչպես նաև ջրապահովվածություն կստեղծվի 3000-4000 հա վարելահողերի համար: Կապսի ջրամբարի կառուցումը հնարավորություն կտա մարզի Ախուրյանի և Անիի տարածաշրջանների շատ համայնքներում հացահատիկի ինքնահոս համակարգով մշակությունից անցնելու, ինչպես ինտենսիվ, այնպես էլ բարձրարժեք գյուղատնտեսական մշակաբույսերի և այգիների հիմնմանը:
Նշված տարածաշրջանների 1400-1600 մ բարձրություններում հնարավոր կլինի ավելի քան 3000 հա գարու ցանքերը փոխարինել կաթիլային ոռոգմամբ ինտենսիվ այգիներով»,- ասվում է հաղորդագրությունում:
