17.01.2026 | 14:14
Հրդեհ Տիչինայի փողոցում
ԱՄՆ կոնգրեսականները խոստանում են արգելափակել Վաշինգտոնի կողմից F-16-երի վաճառքը Թուրքիային
Քաղաքականություն
11.07.2022 | 14:16
ԱՄՆ 35 օրենսդիրներ երկկուսակցական նամակ են ուղարկել նախագահ Ջո Բայդենին՝ դեմ արտահայտվելով Թուրքիային F-16 կործանիչների հնարավոր վաճառքին և արդիականացմանը՝ վկայակոչելով Անկարայի կողմից «մարդու իրավունքների ահռելի խախտումները» երկրում և երկրից դուրս, գրում են թուրքական լրատվամիջոցները։
Թվիթերյան իր էջում ԱՄՆ կոնգրեսական Ֆրենկ Փալոնը հրապարակել է նամակը։
«Մենք չպետք է աջակցենք Թուրքիայի զինված ուժերին, քանի դեռ շոշափելի քայլեր չեն ձեռնարկվել՝ դադարեցնելու Թուրքիայի նախագահ Ռեջեփ Թայիփ Էրդողանի ապակայունացնող գործողությունները և միջազգային իրավունքի խախտումները։ Ամերիկյան առաջադեմ կործանիչների վաճառքը Թուրքիային չի մղի Էրդողանին հանկարծակի վերածվել լավ դաշնակցի։ Ավելի հավանական է, որ այդ զենքերը տարածաշրջանում կհանգեցնեն հետագա մահվան և ավերածությունների»,- ասվում է նամակում:
Նշվում է, որ հատկապես Էրդողանի ռեժիմը «տարիների ընթացքում բազմիցս օգտագործել է իր ռազմական հզորությունը՝ ապակայունացնելու Արևելյան Միջերկրականը, Մերձավոր Արևելքը, Հարավային Կովկասը և Հյուսիսային Աֆրիկան»։ Ավելին, ասվում է, որ «Թուրքիայի կողմից աջակցվող ուժերն այս ներխուժումների ժամանակ օգտագործել են ամերիկյան արտադրության զինամթերք և բաղադրիչներ՝ ռազմական հանցագործություններ կատարելու համար, ներառյալ՝ նպատակաուղղված ռմբակոծելով քաղաքացիական թիրախները, ինչպիսիք են հիվանդանոցներն ու դպրոցները Իրաքում, Սիրիայում և Լեռնային Ղարաբաղում։
«Քանի որ ձեր վարչակազմը ձգտում է առաջ մղել նոր F-16-երի և արդիականացման սարքավորումների վաճառքը Թուրքիային, խնդրում ենք՝ իմացեք, որ մենք՝ որպես Կոնգրեսի անդամներ, կձեռնարկենք բոլոր գործողությունները՝ դա թույլ չտալու համար»,- ասվում է նամակում։
Հիշեցնենք, որ Մադրիդում կայացած ՆԱՏՕ-ի գագաթնաժողովում ԱՄՆ նախագահ Ջո Բայդենը հայտարարել էր, որ Վաշինգտոնն աջակցում է Թուրքիային F-16 կործանիչների վաճառքին և վստահ է, որ կարող է ստանալ Կոնգրեսի համաձայնությունը, որն անհրաժեշտ է վաճառքի համար։
Էմմա Չոբանյան
