15.12.2025 | 18:30
Idcoin-եր և idplus նվեր-քարտեր՝ Big Christmas Market-ին
Հայաստանում անպտղության ցուցանիշը 16,8 տոկոս է․ ԱՀԿ չափանիշներով սա մտահոգիչ թիվ է․ ՏԵՍԱՆՅՈՒԹ
Հասարակություն
11.07.2022 | 12:28
Հայաստանում անպտղության ցուցանիշը 16,8% է։ Այս ցուցանիշը բարձր է Առողջապահության համաշխարհային կազմակերպության հաստատած սահմանային ցուցանիշից. ԱՀԿ չափանիշներով սա բավականին մտահոգիչ ցուցանիշ է:
«Հասարակական հետազոտությունների առաջատար խումբ» հասարակական կազմակերպությունը, ՄԱԿ-ի Բնակչության հիմնադրամի աջակցությամբ 2020-21 թթ.-ին իրականացրել է «Անպտղության տարածվածությունը ՀՀ բնակչության շրջանում» հետազոտություն։ Հարցմանը մասնակցել է վերարտադրողական տարիքի 3000 անձ Երևանից և ՀՀ բոլոր մարզերից:
«Անպտղության տարածվածությունը Հայաստանի Հանրապետության բնակչության շրջանում» թեմայով մամուլի ասուլիսի ժամանակ ՄԱԿ-ի Բնակչության հիմնադրամի հայաստանյան գրասենյակի սեռական և վերարտադրողական առողջության ծրագրի համակարգող Նարինե Բեգլարյանը նշեց, որ կատարված հետազոտության տվյալների համաձայն՝ ՀՀ-ում առաջնային անպտղություն ունի հարցվողների 1,7%-ը: Դրանք այն զույգերն են, որոնք անցյալում երեխա չեն ունեցել և 12 կամ ավել ամիս կանոնավոր, անպաշտպան սեռական հարաբերությունների պարագայում չեն հասել հղիության:
Երկրորդային անպտղություն ունի հարցվողների 15,1%-ը: Դրանք այն զույգերն են, որոնք անցյալում ունեցել են առնվազն 1 երեխա, սակայն վերջին 12 կամ ավել ամիս կանոնավոր, անպաշտպան սեռական հարաբերությունների պարագայում չեն հասել հղիության:
Բեգլարյանի խոսքով՝ վերարտադրողականությունը ՀՀ-ում չի ապահովվում, առկա է նաև անպտղության խնդիրը. «Դա մեզ համար օրհասական խնդիր է, անհրաժեշտ է օր առաջ միջոցառումներ ձեռնարկել, որպեսզի անպտղության ցուցանիշը լավանա և այդ պոտենցիալը ևս օգտագործվի վերարտադրողականությունն ապահովելու համար»:
Մանրամասները՝ տեսանյութում:
