08.06.2026 | 19:51
Անհամբեր սպասում եմ մեր լավ և շարունակական համագործակցությանը. Դանիայի վարչապետը՝ Փաշինյանին
Ի՞նչ է տեղի ունեցել Ելփինում․ ադրբեջանական հերթական ագրեսիայի հետքերով․ ՏԵՍԱՆՅՈՒԹ
Քաղաքականություն
08.07.2022 | 19:35
Վայոց ձորի մարզի Ելփին գյուղի ճանապարհին կից գտնվող հացատան մոտ կայանված մեքենայի վրա են երեկ կրակել ադրբեջանական դիրքերից։ Հակառակորդի հենակետերը դիմացի սարին են տեղակայված։
Դեպքի մասին հացատան տնօրենը խոսել չցանկացավ․ նախօրեի դեպքից հետո դեռ ուշքի չեն եկել։ Մեքենայում այդ պահին մարդ չի եղել։ Կրակոցը, ըստ ականատեսների, խոշոր տրամաչափի զինատեսակից է եղել․ գնդակը վնասել է մեքենան և դուրս եկել մյուս կողմից։
ՀՀ Պաշտպանության նախարարության՝ երեկ տարածած հաղորդագրության մեջ ևս նշվում է, որ օգտագործվել են խոշոր տրամաչափի հրաձգային զինատեսակներ։ Հակառակորդը կրակ է բացել Ելփին գյուղի հատվածում տեղակայված հայկական մարտական դիրքերի, նաև՝ դեպի գյուղ տանող ճանապարհի ուղղությամբ: Հայկական կողմը դիմել է պատասխան գործողությունների, ինչի արդյունքում ադրբեջանական ստորաբաժանումների կրակը լռեցվել է։
Կրակոցի ձայները, որ հիմնականում հայկական դիրքերի ուղղությամբ են լինում, լսելի են նաև Ելփին գյուղում։
Ադրբեջանցիներն այս տարածքում դիրքավորվել են 2018 թվականին՝ իրենց դիրքերն առաջ տալով չեզոք գոտու հաշվին։ Դրա հետևանքով միջպետական ճանապարհի Արենի-Ելփին գյուղերի հատվածը հայտնվել է ուղիղ նշանառության տակ: Ելփին գյուղը, բարեբախտաբար, նշանառության տակ չէ։
3 օր առաջ ադրբեջանական կողմը կրակ էր բացել նույն մարզի Խաչիկ գյուղի ուղղությամբ։ Կրակոցները բավականին ինտենսիվ են եղել և դադարել են միայն հայկական կողմի պատասխանից հետո։ Թիրախավորել էին գյուղի մերձակա ճանապարհին շինաշխատանքներ իրականացնողներին։ Կրակոցների հետևանքով ոչ ոք չէր տուժել, վնասվել է համայնքապետ Հովիկ Սմբատյանի ծառայողական «Նիվա» մակնիշի ավտոմեքենան։
Մանրամասները՝ տեսանյութում։
Սաթենիկ Հայրապետյան
