22.04.2026 | 16:07
Մինչ այս պահը 3 կուսակցություն է ընտրություններին մասնակցելու փաստաթուղթ ներկայացրել. ԿԸՀ խոսնակ․ ՏԵՍԱՆՅՈՒԹ
Մոսկվայի պատգամավոր Ալեքսեյ Գորինովը դատապարտվել է 7 տարվա ազատազրկման` «ռազմական կեղծիքի» համար
Քաղաքականություն
08.07.2022 | 16:13
Մոսկվայի Մեշչանսկի դատարանը 7 տարի ժամկետով ազատազրկման է դատապարտել քաղաքային պատգամավոր Ալեքսեյ Գորինովին՝ ռուսական բանակի մասին «ֆեյքեր» տարածելու գործով։ Այս պատժաչափը դատախազությունը պահանջել է՝ պատգամավորների խորհրդի նիստում նրա ելույթի համար, որում Գորինովը, մասնավորապես, «պատերազմ» է անվանել Ռուսաստանի ներխուժումն Ուկրաինա, փոխանցում է BBC-ի ռուսական ծառայությունը։
«Գորինովը դիտավորյալ հանցագործություն է կատարել և տեղյակ է եղել հասարակական վտանգի մասին, ինչը քաղաքացիների մոտ տագնապ և անհանգստության զգացում է առաջացրել»,- ասվում է դատարանի որոշման մեջ։
Դատավճռի հրապարակման ժամանակ պատգամավորը պահել է «Ձեզ դեռ պե՞տք է այս պատերազմը» մակագրությամբ պաստառ։ Կարգադրիչներից մեկը փորձել է թույլ չտալ նրան լուսանկարել, սակայն անարդյունք։
60-ամյա Գորինովին մեղադրանք է առաջադրվել ծանրացուցիչ հանգամանքներով «ֆեյքերի» տարածման հոդվածով, ըստ քննիչների՝ հանցագործությունը կատարվել է նախնական համաձայնությամբ, օգտագործելով պաշտոնեական դիրքը՝ ատելության կամ թշնամանքի դրդապատճառով։
Սա ՌԴ Քրեական օրենսգրքի 207.3-րդ հոդվածով նախատեսված առաջին դատավճիռը չէ, այլ առաջին դեպքն է, երբ մեղադրյալը ստացել է իրական ժամկետ։ «Ռազմական ֆեյքերի» հոդվածով առավելագույն պատիժը 15 տարվա ազատազրկումն է։
Տաթև Ֆռանգյան
