18.12.2025 | 23:24
ՀՀ տարածքում ավտոճանապարհները հիմնականում անցանելի են
Լավրովը վաղաժամ լքում է Բալիում ընթացող G20-ի ԱԳ նախարարների հանդիպումը
Քաղաքականություն
08.07.2022 | 12:46
Ռուսաստանի ԱԳ նախարար Սերգեյ Լավրովը վաղաժամ լքում է Ինդոնեզիայի Բալի կղզում անցկացվող G20-ի երկրների արտգործնախարարների համաժողովը, գրում է DW-ի ռուսական ծառայությունը։
«Լավրովը դեռևս երկկողմ բանակցություններ է անցկացնում, այնուհետև նա հանդես կգա մամուլի համար ու կհեռանա»,-dpa-ին տված հարցազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան։
Սա նշանակում է, որ Լավրովը կեսօրին չի մասնակցի պաշտոնական ընթրիքին և G20-ի հանդիպումներին։ Ավելի վաղ էլ տեղեկություններ էին տարածվել, որ G20-ի ԱԳ նախարարները հրաժարվել են համատեղ խմբակային լուսանկարից՝ Լավրովի պատճառով։
Սերգեյ Լավրովը ելույթից անմիջապես հետո լքել է G20-ի նիստերի սենյակը՝ չսպասելով Գերմանիայի ԱԳ նախարար Անալենա Բերբոքի խոսքին, որն անմիջապես ելույթ է ունեցել իրենից հետո։
Նշվում է նաև, որ համաժողովին ժամանելուն պես Լավրովին են մոտեցել գերմանացի երկու լրագրողներ ու հարցրել, թե ե՞րբ է դադարեցնելու Ուկրաինայում պատերազմը և ինչո՞ւ դա չի անում։ Լրագրողներին անվտանգության աշխատակիցները դուրս են ուղեկցել։
Էմմա Չոբանյան
