10.10.2026 | 10:55
Ռոնալդուն 980-րդ գոլն է խփել կարիերայում. ՏԵՍԱՆՅՈՒԹ
ԵՄ բյուրոկրատիան արգելափակել է Ուկրաինային 1,5 միլիարդ եվրոյի վարկը․ Bloomberg
Քաղաքականություն
08.07.2022 | 13:21
Բյուրոկրատական խնդիրների պատճառով Եվրամիությունն արգելափակում է Ուկրաինային 1,5 մլրդ եվրոյի վարկը։ Այս մասին հայտնում է Bloomberg-ը՝ վկայակոչելով եվրոպացի պաշտոնյաների, որոնք ցանկացել են անանուն մնալ։ Նրանցից մեկի խոսքով՝ եվրոպական զգուշավորությունը գերիշխել է Ուկրաինայի սուր կարիքների նկատմամբ։
Գործակալության տվյալներով՝ Եվրոպական վարկային բանկը (EIB) պատրաստ է միջոցներ տրամադրել Կիևին՝ պատերազմից ավերված պետությանն աջակցելու համար այն իրավիճակում, երբ պաշտպանության ծախսերն ավելանում են, իսկ եկամուտները՝ նվազում, սակայն ԵՀ բյուջետային հանձնաժողովն արգելափակել է այս վարկի թողարկումը՝ վախենալով Ուկրաինայի ֆինանսական անվճարունակությունից։
Աղբյուրների համաձայն՝ Եվրահանձնաժողովը սովորաբար երաշխիքներ է տրամադրում EIB-ի վարկերի համար՝ Եվրոպական միությունից դուրս գործառնությունների նպատակով, ընդհանուր ֆինանսավորման 9%-ի չափով: Բայց այս դեպքում Եվրահանձնաժողովի բյուջետային թևը պնդում է 70%-ի տրամադրման հարցում, եթե Ուկրաինան չկարողանա վերադարձնել միջոցները։
Եվրամիությունը պետք է վստահ լինի, որ Ուկրաինայում դեֆոլտի դեպքում դրանից առաջացած կորուստները կփակվեն։ Այս առումով Եվրահանձնաժողովն այլընտրանքային լուծումներ է փնտրում՝ կիսելու այս վարկի հետ կապված որոշ լրացուցիչ ռիսկերը, պարզաբանել է եվրոպացի պաշտոնյան։
Բացի այդ, ըստ Bloomberg-ի, ԵՄ-ն ինքը դժվարություններ է ապրում Ուկրաինային կարճաժամկետ ֆինանսավորման համաձայնեցման հարցում և արդեն ժամանակավորապես կրճատել է Կիև ուղարկվող օգնության չափը։ Այսպիսով, անցյալ շաբաթ Ուկրաինայի համար մայիսին հայտարարված 9 մլրդ եվրոյի փաթեթի առաջին տրանշը՝ 1 մլրդ եվրոյի չափով մակրոֆինանսական օգնության հատկացումը, կանգ է առել այն պատճառով, որ այս ավելի մեծ փաթեթն արգելափակվել է Գերմանիայի կողմից։
Ավելի վաղ՝ հունիսի 29-ին, հայտնի դարձավ, որ Մադրիդում ՆԱՏՕ-ի գագաթնաժողովում Ուկրաինային օգնության նոր փաթեթ է ընդունվել, որը կօգնի նրան անցնել դաշինքի չափանիշներին համապատասխան զենքի։ Այն նաև նախատեսում է Կիևին ոչ մահաբեր օգնության տրամադրում, օրինակ՝ վառելիք։ ՆԱՏՕ-ում DW-ի աղբյուրի փոխանցմամբ՝ նոր փաթեթի համար կհատկացվի մի քանի հարյուր միլիոն եվրո։
Տաթև Ֆռանգյան
