Փաշինյանը նոր շանս տվեց Ծառուկյանին․ «Շանգրի Լա» խաղատունը կվերաբացվի․ ՏԵՍԱՆՅՈՒԹ

Գործադիրն այսօրվա նիստում որոշում կայացրեց պետբյուջեից 4,2 մլրդ դրամ վճարել՝ «Շանգրի Լա» խաղատան լիցենզիայի տուրքը վճարելու համար։ Այս որոշման հիմքում դատարանի վճիռն է։

Կորոնավիրուսի համաճարակի բռնկումից հետո «Շանգրի Լա»-ի նկատմամբ սահմանափակումներ էին կիրառվել, և այդ ժամանակահատվածում խաղատունը չի վճարել եռամսյակային պետտուրքը՝ պատճառաբանելով, որ գործունեությունը դադարեցվել է պարեկի որոշմամբ, սակայն ֆինանսների նախարարի հրամանով խաղատան լիցենզիան կասեցվել էր։ Անցնելով դատական ատյաններով՝ խաղատունը հասել է հաջողության և նախարարի որոշումը ճանաչվել է անհիմն։

Որ այս թեմային պարբերաբար անդրադարձել ու քննադատել է խաղամոլությունն ու դրա գովազդը, վարչապետը նաև այսօրվա նիստում ասաց։ Ընդ որում՝ նիստն ավարտեց կոշտ ձևակերպումներով ու նկատողություններով։

Անդրադառնալով Փաշինյանի հայտարություններին՝ «Իրազեկ և պաշտպանված սպառող» ՀԿ նախագահ Բաբկեն Պիպոյանն արձանագրում է՝ Կառավարության խոսքն ու գործը չեն համապատասխանում։ Ըստ Պիոպոյանի՝ խաղատների ու օնլայն խաղերի հասցրած տնտեսական վնասները շատ ավելի մեծ են։

Խնդիրը, իրավապաշտպան Նինա Կարապետյանցի կարծիքով, Կառավարության՝ բոլոր խնդիրների պարագայում միայն իրավիճակային լուծումներ գտնելու մեջ է։ Կարապետյանցը որոշման վրա չի զարմանում և չի էլ ակնկալում, որ որևէ պաշտոնյա պատասխանատվության կենթարկվի։ Ասում է՝ նախկինում որևէ ոլորտի պատասխանատու իր ոլորտում խնդիրներ առաջացնելու համար մինչ այս պահը պատասխանատվության չի ենթարկվել։

Երևանին ամենամոտ և Հայաստանի ամենախոշոր «Շանգրի Լա» խաղատունը կազմակերպող իրավաբանական անձը «Օնիրա քլաբ» ՍՊԸ-ն է, որի բաժնետերերն են ընտրակաշառքի գործով մեղադրյալ Գագիկ Ծառուկյանը և նրա կինը՝ Ջավահիր Ծառուկյանը, մոտ 3 տոկոս բաժնեմաս էլ ունի «Մուլտի Գրուպ» կոնցեռնը։

2020 թվականի հունիսին, հիշեցնենք, Ազգային անվտանգության ծառայությունը խուզարկություն էր իրականացրել խաղատանը՝ հայտարարելով, որ ապօրինի ձեռնարկատիրական գործունեության արդյունքում, առանց հատուկ թույլտվության լիցենզավորման ենթակա ապօրինի ձեռնարկատիրական գործունեության արդյունքում, ինչպես նաև խաբեության եղանակով պետությանը տասնյակ միլիարդավոր դրամների հասնող վնասի պատճառման դեպքեր են բացահայտվել։

Մանրամասները՝ տեսանյութում։

Սաթենիկ Հայրապետյան