Ղազախստանը որոշել է շրջանցել ՌԴ-ին և նավթի տարանցումն իրականացնել Ադրբեջանով՝ դեպի Թուրքիա և Չինաստան

Նովոռոսիյսկից ղազախական նավթի արտահանման մշտական դադարեցման ֆոնին երկրի իշխանությունները որոշել են զարգացնել մատակարարումներն այլընտրանքային երթուղով՝ Ադրբեջանով դեպի Չինաստան։

Այսօր Ղազախստանի նախագահ Կասիմ Ժոմարտ Տոկաևը խորհրդակցություն է անցկացրել տրանսպորտային տարանցման ներուժի զարգացման վերաբերյալ ու հայտարարել նավթի մատակարարումների դիվերսիֆիկացման անհրաժեշտության մասին։ EADaily-ի փոխանցմամբ՝ այս մասին տեղեկացվել է երկրի նախագահի պաշտոնական կայքում հրապարակված հաղորդագրությամբ։

«Առաջատար ուղղություն է հանդիսանում Տրանսկասպյան երթուղին։ Հանձնարարում եմ «ԿազՄունայԳազին» մշակել օպտիմալ տարբերակ դրա իրականացման համար, այդ թվում՝ Թենգիզյան նախագծի ներդրողների ներգրավման հնարավորությամբ։ Կառավարությունը «Սամրուկ-Կազին»-ի հետ միասին պետք է միջոցներ ձեռնարկի՝ Ատիրաու-Քենկիյակ և Քենկիյակ-Կումկոլ նավթամուղերի թողունակությունը մեծացնելու համար»,- ասել է Կասիմ Ժոմարտ Տոկաևը:

Մինչև վերջերս Կասպյան խողովակաշարային կոնսորցիումի նավթամուղը դեպի Նովոռոսիյսկ ղազախական նավթի մատակարարման հիմնական երթուղին էր, որտեղ հումքը բեռնվում է լցանավերի վրա: Դրա հզորությունը կազմում է տարեկան 67 մլն տոննա, իսկ անցյալ տարի մատակարարումների 87%-ը եղել է Ղազախստանում արդյունահանված հումքը։

EADaily-ն նշում է, որ այս տարի Կասպյան խողովակաշարային կոնսորցիումը մշտապես կանգնած է մարտահրավերների առաջ։ Սկզբում դրա աշխատանքը կանգնել է ծովային բեռնման համակարգերի խափանման պատճառով։ Այնուհետև հայտնաբերվել է Երկրորդ համաշխարհային պատերազմի ժամանակներից մնացած զինամթերք, իսկ հուլիսի 5-ին ռուսական դատարանը 30 օրով դադարեցրել է կոնսորցումի գործունեությունը նավթի արտահոսքի չեզոքացման ծրագրի շրջանակում՝ մի շարք փաստաթղթային խախտումների պատճառով:

Դատելով Ղազախստանի նախագահի հայտարարությունից՝ իշխանությունները ցանկանում են ավելի շատ նավթ մատակարարել Չինաստան և ակտիվորեն օգտագործել տարանցումն Ադրբեջանի տարածքով՝ նավթը թուրքական Ջեյհան նավահանգիստ հասցնելու համար։

Տաթև Ֆռանգյան