22.04.2026 | 14:37
«Ինտերի» ու «Միլանի» ֆուտբոլիստներն անցնում են մարմնավաճառության հետ կապված աղմկահարույց գործով
Ուզբեկստանի նախագահը Կարակալպակստանում անկարգությունների համար մեղադրել է արտաքին ուժերին
Քաղաքականություն
07.07.2022 | 14:34
Ուզբեկստանի նախագահ Շավքաթ Միրզիոևն «արտաքին ուժերին» է մեղադրել Կարակալպակստանի ինքնավար հանրապետությունում անկարգություններ հրահրելու մեջ, որտեղ, կառավարության հայտնած տեղեկությունների համաձայն, անցյալ շաբաթ դաժան բախումների հետևանքով զոհվել է 18 մարդ, գրում է VOA-ն։
Միրզիոևն ասել է, որ «տհաճ իրադարձությունները» տառապանքներ են պատճառել, և գլխավոր դատախազը մանրակրկիտ հետաքննություն կանցկացնի: Իշխանությունները հայտնել են, որ անկարգությունների ընթացքում զոհվել է 14 խաղաղ բնակիչ և 4 իրավապահ:
Չորեքշաբթի Ուզբեկստանի ԱԳՆ-ն հայտնել է, որ լուրջ վիրավորում է ստացել 107 իրավապահ, նրանցից 23-ի վիճակը ծանր է։
«Իհարկե, այս իրադարձությունները չեն կազմակերպվել մեկ կամ 10 օրում։ Այս գործողությունները տարիներով պատրաստվել են չարամիտ արտաքին ուժերի կողմից։ Դրանց գլխավոր նպատակն Ուզբեկստանի տարածքային ամբողջականության նկատմամբ ոտնձգությունն է և ազգամիջյան կոնֆլիկտի հրահրումը»,- հայտարարել է Միրզիոևը։
Երկրի ղեկավարը, սակայն, ոչ մի ապացույց չի ներկայացրել օտարերկրյա միջամտության մասին, ոչ էլ նշել է որևէ կոնկրետ երկիր։
Հիշեցնենք՝ Ուզբեկստանում բողոքի ցույցեր են սկսվել՝ ի պատասխան Կարակալպակստանի ինքնավար հանրապետության կարգավիճակը վերացնելու՝ կառավարության ծրագրերի։ Ուզբեկստանի նախագահը շտապել է հրաժարվել այս առաջարկից, երբ սկսվել են զանգվածային բողոքի ցույցերը։
Տաթև Ֆռանգյան
