16.09.2026 | 15:15
Արման Ծառուկյանը հանդիպել է առաջիկա մրցակցին. ՏԵՍԱՆՅՈՒԹ
Թուրքիան հարցում է ուղարկել Շվեդիային և Ֆինլանդիային՝ «ահաբեկիչներին» արտահանձնելու պահանջով
Քաղաքականություն
06.07.2022 | 15:12
Թուրքիան գրավոր հարցում է ուղարկել Շվեդիային և Ֆինլանդիային՝ պահանջելով արտահանձնել «ահաբեկչական կազմակերպությունների» անդամներին։ Այս մասին հայտնել է Թուրքիայի արդարադատության նախարար Բեքիր Բոզդաղը, գրում է ՏԱՍՍ-ը։
Մասնավորապես, Անկարան պահանջել է արտահանձնել «Քուրդիստանի աշխատավորական կուսակցության» և FETO-ի ներկայացուցիչներին, որոնց մեղադրում է 2016 թվականին հեղաշրջման փորձի մեջ։
Օրերս էլ Թուրքիայի նախագահ Ռեջեփ Թայիփ Էրդողանը հայտնել էր, որ Անկարան Շվեդիայից պահանջում է արտահանձնել 73 «ահաբեկչի», սակայն միայն «3-4»-ն են արտահանձնվել։
Հիշեցնենք, որ Շվեդիայի և Ֆինլանդիայի՝ ՆԱՏՕ-ին անդամակցության վետոն հանվել է Թուրքիայի կողմից և երեք երկրները հուշագիր են ստորագրել։
Նախօրեին, սակայն, Շվեդիայի ԱԳ նախարար Անն Լինդեն և Ֆինլանդիայի ԱԳ նախարար Պեկկա Հաավիստոն վստահեցրել են, որ կկատարեն ահաբեկչության դեմ պայքարի վերաբերյալ Թուրքիայի հետ ձեռք բերված պայմանավորվածությունները, սակայն դրա հետ մեկտեղ՝ չեն երաշխավորել քրդերի արտահանձնումը թուրքական դիմումների համաձայն։ Նրանք նշել են, որ արտահանձնման որոշումը կայացնելու է դատարանը և գործընթացներն ընթանալու են երկրների օրենսդրությանը համապատասխան։
Էմմա Չոբանյան
