17.01.2026 | 15:55
2025-ին Հայաստանի աշակերտները միջազգային օլիմպիադաներում նվաճել են 91 մեդալ․ ԿԳՄՍ նախարար
Էրդողանին բռնապետ անվանած Իտալիայի վարչապետը Անկարայում մարդու իրավունքների խնդիրների մասին է խոսել
Քաղաքականություն
06.07.2022 | 17:16
Իտալիայի վարչապետ Մարիո Դրագին հայտարարել է, որ Անկարայում Թուրքիայի նախագահ Ռեջեփ Թայիփ Էրդողանի հետ հանդիպման ժամանակ բարձրացրել է մարդու իրավունքների կարևորության հարցը։ Այս մասին գրել է Agence France-Presse-ը, փոխանցում է TurkishMinute-ը։
Դրագին կառավարական մեծ պատվիրակությամբ ժամանել է Անկարա՝ Էրդողանին բռնապետ անվանելուց և թուրքական պետության ղեկավարից «հակահարված» ստանալուց մեկ տարի անց։ Նրանց բանավեճը սկսվել էր Էրդողանի՝ Եվրահանձնաժողովի նախագահ Ուրսուլա ֆոն դեր Լյայենի հետ հանդիպման ժամանակ նստատեղերի վերաբերյալ դիվանագիտական թեժ վեճի ժամանակ։ Դրագին և Էրդողանը Հռոմում ու Բրյուսելում գագաթնաժողովների շրջանակում կարճատև բանակցություններ վարել են, սակայն նախօրեին Անկարայում հանդիպումը նրանց առաջին պաշտոնական տեսակցությունն էր վեճից հետո:
Ղեկավարներից որևէ մեկը հանդիպման ժամանակ այս թեման չի շոշափել։ Սակայն Դրագին նշել է, որ բարձրացրել է մարդու իրավունքների հարցերը և Թուրքիայի՝ անցյալ տարի Կանանց նկատմամբ բռնության դեմ պայքարի Ստամբուլի կոնվենցիայից դուրս գալու հարցը:
«Մեր զրույցում նաև քննարկել ենք մարդու իրավունքների հարգման կարևորությունը։ Ես քաջալերել եմ նախագահ Էրդողանին՝ կրկին միանալ Ստամբուլի կոնվենցիային»,- ասել է Իտալիայի վարչապետը։
Էրդողանը չի պատասխանել Դրագիի այս մեկնաբանությանը։
Թուրքիայում մարդու իրավունքների վերաբերյալ միջազգային անհանգստությունն աճեց 2016 թվականի ռազմական հեղաշրջման փորձից հետո, որին հաջորդեցին լայնածավալ զտումները, արդյունքում տասնյակ հազարավոր մարդիկ բանտարկվեցին կամ զրկվեցին պետական աշխատանքից:
Էմմա Չոբանյան
