22.04.2026 | 22:17
Հայաստանի մի շարք հասցեներում էլեկտրաէներգիայի անջատումներ կլինեն
Ռուսաստանի սպառնալիքի պատճառով Լատվիան մտադիր է վերադարձնել զորակոչը
Քաղաքականություն
06.07.2022 | 13:15
Լատվիայի պաշտպանության նախարար Արտիս Պաբրիկսը հայտնել է, որ Ռուսաստանի կողմից սպառնալիքի ֆոնին իր ղեկավարած գերատեսչությունը կառաջարկի վերադարձնել համընդհանուր զինծառայությունը երկրում, գրում է BBC-ի ռուսական ծառայությունը։
«Լատվիայի ներկայիս ռազմական համակարգը սպառել է իրեն: Մինչդեռ մենք հիմքեր չունենք ենթադրելու, որ Ռուսաստանը կփոխի իր վարքագիծը»,- ասել է Պաբրիկսը:
Լատվիան 2006 թվականից վերացրել է պարտադիր զինվորական ծառայությունը։ Այդ ժամանակից ի վեր երկրի զինված ուժերում ծառայում են միայն պրոֆեսիոնալ զինվորականներ, ինչպես նաև կամավորներ Ազգային գվարդիայի կազմում («Զեմեսսարձե»), որոնք իրենց պարտականությունները կատարում են հանգստյան օրերին՝ հիմնական աշխատանքից ազատ ժամանակ։
AFP-ի տվյալների համաձայն՝ Լատվիայի զինված ուժերում ներկայում կա 7500 պրոֆեսիոնալ զինծառայող և Ազգային գվարդիայի անդամ։ Նրանց աջակցում են ՆԱՏՕ-ի անդամ երկրների ևս 1500 զինվորականներ, որոնք տեղակայված են երկրում:
Ըստ Պաբրիքսի՝ Պաշտպանության նախարարության պլանների համաձայն՝ հինգ տարվա ընթացքում կներդրվի պարտադիր զինվորական ծառայություն։ Delfi-ն պարզաբանում է, որ 2023-2028 թվականներին 18-ից 27 տարեկան տղամարդիկ կարող են կամավոր զինվորական ծառայության անցնել, այնուհետև զորակոչը կդառնա պարտադիր։
Լատվիայի Պաշտպանության նախարարության պլանը դեռ պետք է հաստատի երկրի օրենսդիր մարմինը՝ Սեյմը։
Տաթև Ֆռանգյան
