29.06.2026 | 00:59
ԱԱ-2026. Վերջին վայրկյաններին հաղթական գոլ` փլեյ-օֆֆի մեկնարկային խաղում. ՏԵՍԱՆՅՈՒԹ
Շվեդիայի և Ֆինլանդիայի ԱԳ նախարարները վստահեցրել են, որ քրդերին Թուրքիային արտահանձնելու վերաբերյալ որոշումներն ընդունելու են դատարանները
Քաղաքականություն
05.07.2022 | 19:23
Շվեդիայի ԱԳ նախարար Անն Լինդեն և Ֆինլանդիայի ԱԳ նախարար Պեկկա Հաավիստոն վստահեցրել են, որ կկատարեն ահաբեկչության դեմ պայքարի վերաբերյալ Թուրքիայի հետ ձեռք բերված պայմանավորվածությունները, սակայն դրա հետ մեկտեղ՝ չեն երաշխավորել քրդերի արտահանձնումը թուրքական դիմումների համաձայն, գրում է swissinfo-ն։
«Մենք լիովին կատարելու ենք հուշագրի պայմանները, բայց այն չի պարունակում մարդկանց որևէ ցուցակ կամ դրա նման մի բան»,- ասել է Շվեդիայի ԱԳ նախարար Անն Լինդեն՝ պատասխանելով հարցին՝ արդյո՞ք Թուրքիան արտահանձնման նոր դիմումներ ուղարկել է։
«Հուշագրում մենք վստահեցրել ենք Թուրքիային, որ լրջորեն ենք վերաբերվելու ահաբեկչության դեմ պայքարին և արտահանձնման բոլոր գործընթացներն անցնելու են մեր օրենսդրությանը համապատասխան։ Գերագույն դատարանն է վերջնական որոշում կայացնելու, այլ ճանապարհ չկա»,- հավելել է Լինդեն։
Ֆինլանդիայի արտգործնախարար Պեկկա Հաավիստոն իր հերթին ասել է, որ իր տեղեկություններով՝ Անկարայի կողմից կոնկրետ անձանց արտահանձնելու նոր խնդրանքներ չեն եղել։
«Որքան գիտեմ՝ նոր հարցումներ չեն եղել։ Ֆինլանդիան անվտանգ հանգրվան չէ ահաբեկիչների համար և չի ցանկանում լինել ապագայում: Մենք խստացնում ենք մեր օրենսդրությունը, և դա նշվել է հուշագրում։ Ես կարծում եմ, որ դա կարևոր է»,- ասել է նա։
Հավելենք, որ Թուրքիան չեղարկել է իր վետոն Շվեդիայի ու Ֆինլանդիայի՝ ՆԱՏՕ-ին անդամակցության մասով և երեք երկրների միջև հուշագիր է կնքվել։
Էմմա Չոբանյան
