Ռուսները թամաշա էին անում Սյունիքի բազայից՝ Ադրբեջանը հարձակվել էր ՀՀ-ի վրա․ ի՞նչ կաներ ՆԱՏՕ-ն, երբ իր դաշնակցին սպառնային․ Դանիել Իոաննիսյան․ ՏԵՍԱՆՅՈՒԹ

ՌԴ պաշտպանության նախարար Սերգեյ Շոյգուն ասել է, թե արևմտյան պետությունները, Ուկրաինային զենքի ծավալուն մատակարարումներով, նպատակ ունեն արհեստականորեն ձգձգել ռազմական գործողությունները։ Ըստ ՌԴ-ի տվյալների՝ վերջին ամիսներին արևմտյան երկրներն Ուկրաինային ավելի քան 28 հազար տոննա ռազմական նշանակության բեռներ են փոխանցել։

ԱՄՆ նախագահ Ջո Բայդենն էլ այլ թվերն է ներկայացրել մատակարարված զենքի քանակի վերաբերյալ, թե Ուկրաինային Արևմուտքն ու դաշնակիցներն ինչպիսի ռազմական աջակցություն են հայտնել․ Կիևին տրամադրվել է գրեթե 140 հազար հակատանկային համակարգ, ավելի քան 600 տանկեր, 500 հրետանային համակարգեր, ավելի քան 600 հազար հրետանային զինամթերք, ինչպես նաև ժամանակակից բազմակի արձակման հրթիռային համակարգեր, հակաօդային պաշտպանության համակարգեր։ Առաջատարն ԱՄՆ-ն է մատակարարման ծավալով։ Մեծ Բրիտանիայի ռազմական նոր աջակցության գումարը 1․2 միլիարդ դոլար է, տարեսկզբից բրիտանական աջակցությունն Ուկրաինային 5 միլիարդ դոլարի է հասնում։

Ինչպե՞ս համեմատել Ուկրաինայի դաշնակից Արևմուտքին Հայաստանի դաշնակից Ռուսաստանի հետ՝ թե՛ 44-օրյա պատերազմի ժամանակ, թե՛ 2021-ին ադրբեջանական ներխուժումների։

«Իրազեկ քաղաքացիների միավորում» ՀԿ ղեկավար Դանիել Իոաննիսյանը Factor TV-ի հետ հարցազրույցում ասում է, թե «հայկական կողմի հետ պատահածի ֆոնին՝ ՌԴ-ին դաշնակից կոչելն արդեն իսկ ծիծաղելի է հնչում», և նրան համեմատում է ՆԱՏՕ-ի հետ։

«Պատկերացրեք, որ ՆԱՏՕ-ի անդամ որևէ պետության հարևան մտնի դաշինքի հարևան երկիր, մի քանի կիլոմետր առաջ գնա, և ԱՄՆ-ը նույնիսկ չդատապարտի դա, հնարավոր չէ այդպիսի բան։ ՆԱՏՕ-ի երկրների զինուժը կգա զավթիչ ուժերին վռնդելու։ Ադրբեջանցիները մտան Սոթք-Խոզնավարի հատվածներ մի քանի տեղից, ռուսները չդատապարտեցին։ Մինչդեռ ՀԱՊԿ-ի և ՌԴ-ի կողմից ՀՀ-ի նկատմամբ դաշնակցային պարտավորությունները պարտադրում էին նրանց՝ գալ և ուժով վռնդել ՀՀ-ի տարածքներից։ Անգամ Ֆրանսիան և ԱՄՆ-ը դատապարտեցին Բաքվին, ՌԴ-ն՝ ոչ։ Ի՞նչ դաշնակցային հարաբերություն։ Անցյալ տարի Սիսիանում ռուսների ռազմաբազայից աչքով երևում էր, թե ոնց են ադրբեջանական զինված ուժերը հարձակվել Սյունիքի մարզի վրա։ Կես օր ճակատամարտ էր գնում լոկալ մասշտաբի։ Ռուսները ռազմաբազայից թամաշա էին անում»,- հիշեցրեց Իոաննիսյանը։

Հարցազրույցն ամբողջությամբ՝ տեսանյութում։

Ռոբերտ Անանյան