09.10.2026 | 21:27
ՀՀ-ն զգալի առաջընթաց է արձանագրել վիզաների ազատականացման ոլորտում․ ԵՄ գնահատման 2-րդ առաքելությունը ՀՀ-ում է
Իտալիան տուժել է վերջին 70 տարվա ամենասարսափելի երաշտի հետևանքով. երկրի հյուսիսում արտակարգ դրություն է հայտարարվել
Քաղաքականություն
05.07.2022 | 16:28
Իտալիայի հյուսիսսային հինգ շրջաններում արտակարգ դրություն է հայտարարվել վերջին 70 տարվա ամենաուժեղ երաշտի պատճառով, գրում է BBC-ի ռուսական ծառայությունը։
Էմիլիա Ռոմանիան, Ֆրիուլի Վենեցիա Ջուլիան, Լոմբարդիան, Պիեմոնտը և Վենետոն 36,5 միլիոն եվրո կստանան երկրի արտակարգ իրավիճակների հիմնադրամից՝ ջրի պակասի դեմ պայքարելու համար։ Երաշտը սպառնում է ոչնչացնել տարածաշրջանի գյուղատնտեսական արտադրանքի ավելի քան 30%-ը, հայտնում է Coldiretti իտալական գյուղատնտեսական միությունը։ Մի քանի քաղաքապետարաններ արդեն հայտարարել են ջրի նորմավորման մասին։
Երաշտի պատճառը ձմռան ընթացքում տեղումների չափազանց քիչ քանակությունն էր՝ զուգակցված ամառվա շոգի հետ։
«Արտակարգ դրության սահմանումն անհրաժեշտ է՝ ներկայիս իրավիճակի դեմ պայքարելու համար, որը պահանջում է բացառիկ միջոցներ և լիազորություններ»,- ասվում է Իտալիայի կառավարության հայտարարության մեջ։
Բոլոր տուժած շրջանները կենտրոնացած են Պո գետի շուրջ, որն ամենաերկարն է Իտալիայում՝ ավելի քան 650 կիլոմետր երկարությամբ: Պո հովտի ֆերմերներն ասում են, որ գետը տեղ-տեղ ցամաքել է և որոշ հատվածներում ծովի աղի ջուրը ներթափանցել է առվակի մեջ՝ վնասելով բերքը։
Երկուշաբթի Իտալիայի վարչապետ Մարիո Դրագին այցելել է Դոլոմիտներ, որտեղ սառցաբեկորի փլուզման հետևանքով յոթ ալպինիստ է զոհվել: Ինը մարդ վիրավորվել է, մոտ 20-ը անհետ կորել։ Դրագիի խոսքով՝ սառցադաշտի ողբերգությունը և երաշտը գլոբալ տաքացման գործընթացի օղակներն են։
Տաթև Ֆռանգյան
