15.12.2025 | 16:54
ՌԴ ԿԲ-ն բելգիական Euroclear դեպոզիտարիայում իր ակտիվների սառեցման վնասը գնահատել է 18,17 տրիլիոն ռուբլի
Զանգվածային անկարգություններ Ուզբեկստանում․ հարյուրավոր տուժածներ կան
Քաղաքականություն
05.07.2022 | 15:09
Ուզբեկստանի Կարակալպակստանի ինքնավար հանրապետության մայրաքաղաք Նուկուս քաղաքում բողոքի ակցիաների ժամանակ 18 մարդ է զոհվել, կան վիրավորներ։ Այս մասին հայտնել է Ուզբեկստանի Գլխավոր դատախազության ներկայացուցիչ Աբրոր Մամատովը, հաղորդում է «Վեդոմոստի»-ն։
«Նուկուսում զանգվածային անկարգությունների հետևանքով 18 մարդ մահացել է ստացած ծանր վնասվածքներից»,- ասել է Մամատովը:
Ուզբեկստանի Ազգային գվարդիայի մամուլի քարտուղար Դավրոն Ջումանիյազովն ավելի վաղ հայտնել էր, որ անկարգությունների հետևանքով տուժել է 243 մարդ, որոնցից 94-ը գտնվում է հիվանդանոցներում։
Հուլիսի 2-ին Նուկուսում զանգվածային ցույցեր են տեղի ունեցել՝ ընդդեմ Ուզբեկստանի Սահմանադրության փոփոխությունների, մասնավորապես՝ Կարակալպակստանի ինքնիշխանության և նրա ժողովրդի՝ անջատվելու իրավունքի դրույթը Հիմնական օրենքից հանելու առաջարկության դեմ։
Նույն օրը Կարակալպակստան է ժամանել Ուզբեկստանի նախագահ Շավքաթ Միրզիոևը՝ առաջարկելով անփոփոխ թողնել Կարակալպակստանի ինքնիշխանության մասին դրույթները և երկրի Սահմանադրության այլ հոդվածները, որոնք վերաբերում են ինքնավար հանրապետությանը։ Միրզիոևը տարածաշրջանում արտակարգ դրություն է հայտարարել։
Նշենք, որ Կարակալպակստանը գտնվում է Ուզբեկստանի հյուսիս-արևմուտքում և երկրի ամենամեծ շրջանն է։
