09.10.2026 | 16:19
Սպանության նախապատրաստության գործով 4 անձ է ձերբակալվել․ իրավապահները կանխել են հանցագործությունը
Իրանը, Ռուսաստանն ու Թուրքիան ավտոմեքենաների համատեղ արտադրություն կարող են սկսել․ ԶԼՄ-ներ
Քաղաքականություն
05.07.2022 | 16:55
Իրանի, Ռուսաստանի և Թուրքիայի ավտոմոբիլային արդյունաբերության պաշտոնյաները քննարկում են ավտոմեքենաների համատեղ նախագծումն ու արտադրությունը՝ այն բանից հետո, երբ Մոսկվայի և Թեհրանի դեմ պատժամիջոցներն արգելակել են արտադրությունը: Այս մասին գրում է AFP-ն, որին վկայակոչում է TurkishMinute-ը։
«Երեք երկրների ավտոարտադրողների և մատակարարների միջև եռակողմ համագործակցության մեծ հնարավորություն կա։ Այս երեք երկրները կարող են մեծ շուկա գրավել իրենց արտադրանքի համար»,- ասել է Իրանի ավտոպահեստամասեր արտադրողների ասոցիացիայի ղեկավար Մոհամմադրեզա Նաջաֆի-Մանեշը։
Ռուսաստանը, որի նկատմամբ Ուկրաինա ներխուժումից հետո արևմտյան երկրները պատժամիջոցներ են կիրառել, մայիսին արդեն խնդրել է Իրանին մատակարարել իրեն առանցքային բաղադրիչներ, որոնք այլևս հասանելի չեն։
Նաջաֆի-Մանեշն ասել է, որ պատժամիջոցների առկայության դեպքում երեք երկրների միջև հնարավոր համագործակցությունը մեքենաների արտադրության ոլորտում կարող է արագ զարգանալ:
«Այս գաղափարը կարող է կյանքի կոչվել շատ շուտով։ Այս մեքենայի բոլոր մասերի արտադրությունը, պահեստամասերի տրամադրման համար արժութային փոխանցումներից խուսափելը և արտահանման շուկաների առկայությունը նման նախագծի առավելություններից են»,- ասել է նա՝ հավելելով, որ գաղափարն առաջարկվել է Թուրքիայի կողմից, և Ռուսաստանը դրանով հետաքրքրված է։
Իրանը ևս տուժում է արևմտյան պատժամիջոցներից։ Ուկրաինական պատերազմի պատճառով բազմաթիվ արևմտյան ավտոարտադրող հանրահայտ ընկերություններ էլ դադարեցրել են իրենց գործունեությունը Ռուսաստանում։
Իրանն ու Թուրքիան ունեն ցամաքային սահման, իսկ Ռուսաստանը՝ Իրանի և Թուրքիայի հետ սահման ունի, համապատասխանաբար, Սև և Կասպից ծովերով։
Էմմա Չոբանյան
