09.10.2026 | 20:52
Էդուարդ Սպերցյանը գոլային փոխանցում է կատարել «Ալ Ահլիի» կազմում. ՏԵՍԱՆՅՈՒԹ
Եվրահանձնաժողովը կոչ է արել Ուկրաինային՝ ուժեղացնել պայքարը կոռուպցիայի դեմ
Քաղաքականություն
01.07.2022 | 20:23
Եվրահանձնաժողովի նախագահ Ուրսուլա ֆոն դեր Լյայենը կոչ է արել Ուկրաինայի իշխանություններին՝ ուժեղացնել կոռուպցիայի դեմ պայքարը։ Այս մասին գրում է DW-ի ռուսական ծառայությունը։
Պաշտոնական Կիևը, արդեն իսկ իրականացված բարեփոխումների և մասնագիտացված հաստատությունների գործարկման շնորհիվ, ստեղծել է «տպավորիչ հակակոռուպցիոն մեխանիզմ», սակայն այժմ այդ հաստատություններին անհրաժեշտ են «գործելու հնարավորություններ և ճիշտ մարդիկ՝ պատասխանատու պաշտոններ զբաղեցնելու համար», ասել է Եվրահանձնաժողովի ղեկավարը Ուկրաինայի խորհրդարանին ուղղված տեսաուղերձում։
Այսպես, ֆոն դեր Լյայենը կոչ է արել «որքան հնարավոր է՝ շուտ» նշանակել մասնագիտացված հակակոռուպցիոն դատախազության և Ազգային հակակոռուպցիոն բյուրոյի նոր ղեկավարներ։ Բացի այդ, ԵՀ ղեկավարը մատնանշել է Սահմանադրական դատարանի նախատեսվող բարեփոխումների լույսի ներքո դատավորների ընտրության կարգն օրենքով սահմանելու անհրաժեշտությունը։
Ուկրաինայում ընդունված օրենքը, որը կոչված է նվազեցնելու օլիգարխների ազդեցությունը, պետք է իրագործվի «օրինականորեն անթերի», ընդգծել են Բրյուսելում։ Բացի այդ, ԵՀ ղեկավաըր Կիևին կոչ է արել ընդունել ԶԼՄ-ների մասին օրենք, որը կհամապատասխանի Եվրամիության պահանջներին։
Հունիսի 24-ին Եվրամիությունն Ուկրաինային և Մոլդովային շնորհել է ԵՄ անդամի թեկնածուի կարգավիճակ։
Տաթև Ֆռանգյան
