09.10.2026 | 20:52
Էդուարդ Սպերցյանը գոլային փոխանցում է կատարել «Ալ Ահլիի» կազմում. ՏԵՍԱՆՅՈՒԹ
Էրդողանը՝ Հունաստանի հետ պատերազմի հավանականության մասին
Քաղաքականություն
01.07.2022 | 18:52
Թուրքիայի նախագահ Ռեջեփ Թայիփ Էրդողանը հայտարարել է, որ իր երկիրը չի նախատեսում Հունաստանի հետ պատերազմ, սակայն Աթենքը շարունակում է խախտել Թուրքիայի օդային տարածքը, գրում է ՌԻԱ Նովոստին։
«Մենք նման խնդիր չունենք, որ Հունաստանի հետ պատերազմ սկսենք։ Սակայն Հունաստանը չի հետևում իր խոսքերին։ Նրանք 147 անգամ խախտել են օդային տարածքը։ Ինչպե՞ս ենք մենք ապրելու հարևանությամբ։ Ի՞նչ ենք մենք անելու։ Պատասխանելու են իմ ռազմաօդային ուժերը»,- ասել է Էրդողանը լրագրողների հետ զրույցում։
Նա նշել է, որ մի շարք երկրների ղեկավարներ ձգտում են Թուրքիային ու Հունաստանին հաշտեցնել։
«Մենք ասել ենք, որ դա դեռ չենք դիտարկում»,- ասել է Էրդողանը։
Հավելենք, որ վերջին շրջանում Էրդողանը պարբերաբար սպառնալիքներ է հնչեցնում Հունաստանի հասցեին։ Նա նույնիսկ հայտարարել էր, որ Հունաստանի վարչապետ Կիրիակոս Միցոտակիսն իր համար «այլևս գոյություն չունի», և նրան մեղադրել ԱՄՆ կատարած այցի ժամանակ Թուրքիային F-16 կործանիչների վաճառքն արգելափակելու փորձի մեջ։
Էմմա Չոբանյան
