20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Ինչո՞ւ է Բաքուն տապալել Բրյուսելում նախատեսված Գրիգորյան-Հաջիև հանդիպումը
Քաղաքականություն
28.06.2022 | 14:30
ՀՀ վարչապետ Նիկոլ Փաշինյանը նախօրեին առցանց մամուլի ասուլիսի ժամանակ հայտարարեց, որ երեկ Բրյուսելում նախատեսված էր Հայաստանի Անվտանգության խորհրդի քարտուղար Արմեն Գրիգորյանի և Ադրբեջանի նախագահի օգնական Հիքմեթ Հաջիևի հանդիպումը։ Փաշինյանը նշեց, որ Բաքուն չեղարկել է այդ հանդիպումը՝ Ադրբեջանից հնչող հայտարարությունները, որոնցով փորձում են ցույց տալ, թե Հայաստանը ձգձգում է խաղաղության պայմանագրի բանակցությունները և հետագա ընթացքը, տարօրինակ որակելով։
Ադրբեջանական մամուլում Բաքվի կողմից հանդիպման չեղարկման լուրը, ըստ էության, չի արծարծվել։ Սակայն Ադրբեջանի իշխանությունների խոսափող Haqqin.az-ը հակիրճ անդրադարձ է կատարել՝ նշելով հանդիպումից հրաժարվելու պատճառը։ Մասնավորապես, իրազեկ դիվանագիտական աղբյուրները լրատվամիջոցին հայտնել են, որ հանդիպման չեղարկման համար, իբր, «իրական պատճառներ» կան։
«Եթե հայկական կողմն ամեն օր հանդես գա հակասական հայտարարություններով, շարունակի խոսել ԵԱՀԿ Մինսկի խմբի համանախագահերի մեխանիզմի մասին, «Ադրբեջանին տարածքային պահանջներ ներկայացնի», այդ դեպքում ի՞նչ իմաստ կա հանդիպումներ անցկացնելու։ Իսկ Հարավային Կովկասի հարցերով ԵՄ հատուկ ներկայացուցիչ Տոյվո Կլաարի հայտարարությունները պետք է ստուգել»,- ասել է աղբյուրը։
Հավելենք, որ այս ամենը ևս մեկ անգամ ցույց է տալիս, որ Բաքուն որևէ մտադրություն ու ցանկանություն չունի կատարել իր ստանձնած պարտավորությունները։ Ադրբեջանը, որի նախագահ Իլհամ Ալիևն ամեն օր Հայաստանի ու Արցախի հասցեին սպառնալիքներ է հնչեցնում և ՀՀ-ին տարածքային պահանջներ ներկայացնում, հայկական կողմին շարունակում է կեղծ մեղադրանքներ ներկայացնել։
Էմմա Չոբանյան
