19.12.2025 | 14:52
7,5 միլիոն դրամ եմ կորցրել, քննչականում ասացին` գլուխդ ո՞ւր էր այդ ժամանակ. տուժած. Տեսանյութ
Էրդողանի խոսնակը՝ Հայաստանի հետ սահմանը փակելու և հայ-թուրքական հարաբերությունների մասին
Քաղաքականություն
28.06.2022 | 13:00
Թուրքիայի նախագահ Ռեջեփ Թայիփ Էրդողանի մամուլի խոսնակ Իբրահիմ Քալընը ծավալուն հարցազրույց է տվել Habertürk TV-ին, որում անդրադարձել է նաև Թուրքիա-Հայաստանի հարաբերություններին, փոխանցում է ermenihaber-ը։
Նշելով, որ Թուրքիան Եգիպտոսի, Հայաստանի և Սաուդյան Արաբիայի հետ հարաբերությունների կարգավորման փուլում է՝ Քալընը շեշտել է, որ միջազգային հարաբերություններում չկա հավերժական թշնամություն։
«Խաղաղություն եք հաստատում, հաշտվում եք և շարունակում ձեր ճանապարհը»,- ասել է նա
Անդրադառնալով հայ-թուրքական հարաբերությունների կարգավորմանը՝ Քալընը, մասնավորապես, ասել է․ «Հայաստանի հետ ունեցած սահմանն ինչո՞ւ 1992թ. փակեցինք, ինչո՞ւ հարաբերությունները սառեցրեցինք։ Ղարաբաղի «օկուպացիայի» պատճառով։ Հիմա, փառք Աստծո, տեսե՛ք, 30 տարի անց պայմաններն այնպես փոխվեցին, այնպես ձևավորվեցին, որ Ադրբեջանն ու Թուրքիան միավորվեցին, Ղարաբաղն «ազատագրվեց»։ Եվ մենք Հայաստանի հետ կարգավորման գործընթաց սկսեցինք։ Հայաստանի հետ մենք հնուց եկած, հավերժական թշնամություն չունենք և չենք կարող ունենալ։ Նրանք մի սխալ արեցին, Ղարաբաղն «օկուպացրեցին», դրա դիմաց մենք դիրքորոշում որդեգրեցինք»։
Էրդողանի խոսնակն այնուհետև դժգոհել է ԵԱՀԿ Մինսկի խմբի եռանախագահների աշխատանքից՝ համարելով, այդ եռյակը չկարողացավ ոչինչ անել, ինչի հետևանքով հակամարտությունը 30 տարի սառեցված մնաց։ Եվ, ըստ նրա, դա էր պատճառը, որ Թուրքիան և Ադրբեջանը միավորվեցին ռազմական ուժի, տնտեսական ուժի առումով ու խնդիրը լուծեցին։
«Այս պահին մենք հարաբերությունները կարգավորում ենք: Մենք լուրջ, արագ կարգավորման գործընթացով ենք անցնում Հայաստանի հետ»,- նշել է Իբրահիմ Քալընը։
