Գերմանիան անցնում է գազի մատակարարման արտակարգ պլանի

Գերմանիան հայտարարել է էներգետիկ արտակարգ իրավիճակով պայմանավորված` գազային վթարային ծրագրի երկրորդ փուլի մեկնարկի մասին, գրում է BBC-ի ռուսական ծառայությունը։

Երկրի էկոնոմիկայի նախարար Ռոբերտ Հաբեկի խոսքով՝ այս որոշումը պայմանավորված է «Հյուսիսային հոսք 1» գազատարով ռուսական գազի մատակարարումների 60%-ով կրճատմամբ։ Նա բացատրել է, որ նման հոսքի դեպքում Գերմանիան մինչև հաջորդ ձմեռ չի կարողանա իր ամբարները լցնել նախատեսված 90%-ով։

Հաբեկը նշել է, որ այս պահին սպառողներին ոչինչ չի սպառնում, սակայն վատագույն սցենարին պատրաստվելու անհրաժեշտությունն ակնհայտ է։

«Այսուհետ Գերմանիայում գազը դառնում է դեֆիցիտ ապրանքատեսակ։ Շուկան ի վիճակի է ապահովել սպառման պատվերներ և պաշարների չափավոր համալրում, բայց դա չպետք է մեզ ապահովության կեղծ զգացում տա»,- ասել է նախարարը:

Բեռլինը շարունակում է տեղի ունեցողը դիտարկել որպես Ռուսաստանի կողմից Եվրոպային գազային շանտաժ։

«Իմ կարծիքով՝ նպատակն է քանդել այն հիմքերը, որոնց վրա կանգնած են Գերմանիան և Եվրոպան վերջին մի քանի ամիսների ընթացքում՝ մեր մեծ միասնությունը, Ուկրաինայի հետ համերաշխությունը և ազատության պաշտպանության համար գին վճարելու պատրաստակամությունը»,- ասել է Հաբեկը։

Նա կոչ է արել եվրոպական երկրներին՝ չտրվել շանտաժին։ Հարցին՝ արդյո՞ք պետք է մտավախություն լինի, որ գերմանական արդյունաբերությունը կարող է բախվել գազի մատակարարումների նորմավորման հետ, Հաբեկը հույս է հայտնել, որ դա երբեք չի լինի։

«Սակայն, իհարկե, դա բացառել չեմ կարող»,- հավելել է նա։

Տաթև Ֆռանգյան