ՄԻԵԴ-ը վճռել է, որ Թուրքիան խախտել է սիրիացի փախստականի իրավունքները՝ ուժով վերադարձնելով հայրենիք

Մարդու իրավունքների եվրոպական դատարանը (ՄԻԵԴ) վճիռ է կայացրել, որ Թուրքիան ապօրինի կերպով հայրենադարձել է սիրիացի փախստականին այն բանից հետո, երբ նրան ստիպել են ստորագրել փաստաթուղթ, որտեղ ասվում է, որ նա վերադառնում է կամավոր, հայտնում են թուրքական լրատվամիջոցները։

Դատարանը Թուրքիային պարտավորեցրել է Մուհամմադ Ֆավզի Աքքադին վճարել 12,250 եվրո, այդ թվում՝ դատական ծախսերը։ Աքքադը ներկայում Գերմանիայից ապաստան է խնդրել։

Աքքադը Թուրքիա է ժամանել 2014 թվականին և չորս տարի անց երկրում ստացել է կեցության թույլտվություն և «ժամանակավոր պաշտպանության կարգավիճակ»։ Սիրիացին ձերբակալվել է 2018 թվականի հունիսին՝ փորձելով անցնել հարևան Հունաստան։ Աքքադը բռնի կերպով Սիրիա է տեղափոխվել ձերբակալությունից օրեր անց։

Նրան տարել են Թուրքիայի ամենահարավային Հաթայ նահանգ՝ սիրիական սահմանի մոտ, և ստիպել ստորագրել մի փաստաթուղթ, որը նրա համար անհասկանալի է եղել, և որը, պարզվել է, նրա կամավոր վերադարձի ձևաթուղթ է եղել։ Աքքադը նաև ասել է, որ Սիրիայում զինյալների կողմից ձերբակալվել և ծեծի է ենթարկվել, բայց հետո ազատ է արձակվել: Նա վերադարձել է Թուրքիա 2018 թվականի հուլիսին, իսկ ավելի ուշ հասցրել է մեկնել Գերմանիա։

Դատարանը վճռել է, որ Աքքադը ենթարկվել է անմարդկային կամ նվաստացուցիչ վերաբերմունքի, ինչպես նաև իրավունքների այլ խախտումների:

Հավելենք, որ Թուրքիայում 3,7 մլն սիրիացի փախստական է բնակվում։ Վերջին շրջանում երկրում առկա սոցիալ-տնտեսական խնդիրների պատճառով նրանց նկատմամբ վերաբերմունքը կտրուկ վատթարացել է։ Թուրքիայի նախագահ Ռեջեփ Թայիփ Էրդողանն էլ անցած ամիս հայտարարել էր, որ իր կառավարությունն աշխատում է նոր նախագծի վրա՝ նպաստելու երկրում գտնվող մոտ 1 միլիոն սիրիացի փախստականների կամավոր վերադարձին։

Էմմա Չոբանյան