Ալիևը հայտարարել է, որ Ադրբեջանն ու Ուզբեկստանը լրացուցիչ քայլեր են ձեռնարկում ռազմական և ռազմատեխնիկական համագործակցության ոլորտներում

Ուզբեկստանում գտնվող Ադրբեջանի նախագահ Իլհամ Ալիևը հայտարարել է, որ Բաքուն և Տաշքենդը ձեռնարկելու են լրացուցիչ քայլեր ռազմական և ռազմատեխնիկական համագործակցության ուղղությամբ, գրում են ադրբեջանական լրատվամիջոցները։

«Իհարկե, հաշվի առնելով աշխարհում տիրող իրավիճակը, յուրաքանչյուր երկիր պետք է ձգտի ուժեղացնել իր պաշտպանունակությունը: Այսօր Շավքաթ Միրզոևի հետ մեր երկխոսության մի մասը նվիրված էր այս հարցին: Տրվեցին համապատասխան հանձնարարականներ»,- ասել է Ալիևը:

Նա նշել է, որ  արվելու են լրացուցիչ քայլեր՝ Տաշքենդի հետ  ռազմական, ռազմատեխնիկական, ինչպես նաև ռազմական կրթության ոլորտում։

«Մեր երկրները գտնվում են տարածաշրջաններում, որոնք ամենօրյա ուշադրություն են պահանջում անվտանգության և պաշտպանունակության ամրապնդման հարցերին։ Կարծում եմ՝ այն, ինչ այսօր պայմանավորվել ենք, կկատարվի։ Մենք ակտիվորեն շփվելու ենք փորձի փոխանակման, ռազմատեխնիկական ոլորտում համագործակցության, կրթական ոլորտում, ինչպես նաև ծրագրելու ենք մեր քայլերը, որոնք փոխադարձաբար կամրապնդեն մեր անվտանգությունը»,- ասել է Ալիևը։

Հիշեցնենք, որ երկու երկրները նախօրեին համաձայնագիր են ստորագրել ռազմական ոլորտում համագործակցության մասին։ Այն ստորագրել են Ադրբեջանի պաշտպանության նախարար Զաքիր Հասանովը և Ուզբեկստանի պաշտպանության նախարար Բախոդիր Կուրբանովը։ Բացի այդ, ստորագրվել է ռազմատեխնիկական ոլորտում համագործակցության մասին համաձայնագիր։

Էմմա Չոբանյան