19.04.2026 | 23:45
Գետերում նկատվում է ջրի մակարդակի բարձրացում. ՆԳՆ ՓԾ-ն անցել է ուժեղացված ծառայության
Առողջապահության փոխնախարարը՝ պոլիկլինիկաներում առկա խնդիրների մասին․ ՏԵՍԱՆՅՈՒԹ
17.06.2022 | 13:24
ՀՀ առողջապահության նախարարության էլեկտրոնային բարեփոխումների արդյունքում կբարձրացվի բժշկական ծառայությունների արդյունավետությունը, կլինի բուժառուների պատշաճ սպասարկում, բուժհաստատություններում կկրճատվի թղթարարությունը: Այսօր հրավիրված ասուլիսում այս մասին հայտնեց ՀՀ առողջապահության նախարարի տեղակալ Արտակ Ջումայանը:
«Ի՞նչն է մեզ այսօր նյարդայնացնում, ի՞նչ խնդիրներ ենք մենք արձանագրում պոլիկլինիկայում: Բնականաբար, առաջին հարկից սկսվող հերթերն են, բժշկի սենյակում տարատեսակ թղթերի լրացումներ են, նոր հետո բժիշկը զբաղվում է մեզնով, հետո տրվում է տեղեկանք, որը կնքելու համար պետք է գնալ բաժնի վարիչի մոտ, հետո տնօրենի մոտ և այլն: Այս ամեն ինչը տեսնելով՝ մենք մշակել ենք հարթակ, որը կոչվում է էլեկտրոնային հերթագրում: Այն արդեն գործում է Երևանի բոլոր պոլիկլինիկաներում, քաղաքացիները էլեկտրոնային տարբերակով նախապես բժշկի մոտ հերթագրվելու հնարավորություն ունեն»,- նշեց Ջումայանը:
Նրա խոսքով՝ էլեկտրոնային տարբերակով գրանցվելով՝ մինչ բուժառուի գալն, արդեն նրա փաստաթղթերը նախապատրաստվում են, և բուժառուն ստիպված չի լինում հերթ կանգնել: Մատյանների թվայնացման գործընթացի արդյունքում հնարավորություն է տրվում բուժառուի առցանց հերթագրվելուց հետո մի շարք տվյալներ ավտոմատ լրացնել համակարգչում, և դրանք լրացնելու վրա բժիշկը ժամանակ չի կորցնում:
Բարեփոխումներ են սպասվում անաշխատունակության թերթիկը ստանալու պրոցեսում: Արդեն ամբողջությամբ պատրաստ է անաշխատունակության թերթիկի էլեկտրոնային տարբերակը: Մի քանի հստակեցումներից հետո շուտով թղթային տարբերակով չի պահանջվի անաշխատունակության թերթիկ:
«Հարկ չի լինի գնալ և սպասել բաժնի վարիչին, տնօրենին ինչ-որ ստորագրության կամ կնիքի համար: Հիվանդանալու դեպքում բժիշկը քաղաքացու համար բացում է անաշխատունակության թերթիկ»,- նշեց փոխնախարարը:
Մանրամասները՝ տեսանյութում:
