18.05.2026 | 18:28
ՄԻՊ-ը քաղաքական ուժերին հորդորում է զերծ մնալ հանրային պառակտում խորացնող խոսույթից
ՆԱՏՕ-ն հայտարարել է, որ երաշխիքներ չեն տալիս Ֆինլանդիայում և Շվեդիայում միջուկային զենք չտեղակայելու վերաբերյալ
Քաղաքականություն
07.06.2022 | 15:27
Հյուսիսատլանտյան դաշինքը Ռուսաստանին երաշխիքներ չի տալիս Ֆինլանդիայում և Շվեդիայում միջուկային զենք չտեղակայելու վերաբերյալ՝ ՆԱՏՕ-ին այդ երկրների միանալու դեպքում։ ՏԱՍՍ-ի փոխանցմամբ՝ այս մասին շվեյցարական RTS հեռուստաընկերությանը տված հարցազրույցում ասել է դաշինքի գլխավոր քարտուղարի օգնական Կամի Գրանը։
«Յուրաքանչյուր երկիր միջուկային ոլորտում ազատություն ունի ընդունել կամ չընդունել զենքը։ Խոսքն այն մասին չէ, որ սահմանափակումներ կիրառվեն»,- ասել է նա՝ պատասխանելով հարցին, թե Ռուսաստանին երաշխիքներ տրվելո՞ւ են՝ հաշվի առնելով միջուկային զենքի տեղակայման հնարավորությունը Ֆինլանդիայում և Շվեդիայում: Գրանի խոսքով՝ միջուկային զենքի հարցը ՆԱՏՕ-ի անդամ յուրաքանչյուր երկրի ինքնիշխան որոշումն է։
Հարցին, թե ՆԱՏՕ-ն Ռուսաստանից «ռազմական արձագանք» կամ «ուժի ցուցադրում» ակնկալո՞ւմ է՝ ի պատասխան Ֆինլանդիայի և Շվեդիայի դաշինք մտնելուն, Գրանը պատասխանել է. «Ռուսներն իրենք են ասել, որ դա պետք չէ, և ես չեմ կարծում, որ դա արդարացված կլինի»։
Նա նաև հույս է հայտնել, որ Թուրքիայի, Ֆինլանդիայի և Շվեդիայի միջև տարաձայնությունները վերջիններիս ՆԱՏՕ-ին անդամակցելու հարցում կլուծվեն մինչև հունիսի 28-30-ը Մադրիդում կայանալիք ՆԱՏՕ-ի գագաթնաժողովը։
«Կարևոր է հաշվի առնել Թուրքիայի պահանջները և նստել բանակցությունների սեղանի շուրջ։ Ինչ վերաբերում է Ֆինլանդիային, ապա թուրքերի պահանջներն առաջին հերթին քաղաքական են»,- հայտարարել է նա՝ հավելելով, որ Ուկրաինայի՝ ՆԱՏՕ-ին անդամակցության հարցն այժմ օրակարգում չկա։
Էմմա Չոբանյան
