06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Իրավական կարգավորումների խնդիր կա․ Եղիշե Կիրակոսյանը՝ ՄԻԵԴ վճիռների կատարման մասին․ ՏԵՍԱՆՅՈՒԹ
Հասարակություն
07.06.2022 | 12:21
Մեկնարկել է «ՄԻԵԴ վճիռների կատարումը՝ որպես արդար դատաքննության իրավունքի երաշխիք» աշխատաժողովը։ Քննարկվում են Մարդու իրավունքների եվրոպական կոնվենցիայի 6-րդ հոդվածի խախտման վերաբերյալ Հայաստանի Հանրապետության նկատմամբ կայացված ՄԻԵԴ վճիռների կատարմանն առնչվող խնդիրները։
Քննարկմանը մասնակցում են ՄԻԵԴ-ում ՀՀ ներկայացուցիչ Եղիշե Կիրակոսյանն ու ՀՀ ՄԻՊ Քրիստիննե Գրիգորյանը։
Եղիշե Կիրակոսյանն ընդգծեց, որ Եվրոպական դատարանի վճիռների կատարման ընթացքում հանդիպում են խնդիրներ, որոնք տարաբնույթ են և առաջին հայացքից կարող են թվալ շատ պարզ, բայց իրականում շատ բարդ են:
«Խախտումները կրկնվում են, կա իրավական կարգավորումների խնդիր և որոշ խնդիրներ գուցե բխում են իրավական կանոնակարգումների բացերից ու թերություններից: Բայց կան նաև խնդիրներ, որոնք վերաբերում են իրավական համակարգերին, այսինքն՝ դատական համակարգին, իրավապահ համակարգին, որոնք պատասխանատու են երաշխիքներն ապահովելու գործում: Կատարելության հասնելու համար դեռ շատ ճանապարհ ունենք անցնելու»,- նշեց ՄԻԵԴ-ում ՀՀ ներկայացուցիչը:
Կիրակոսյանը կարևորեց խախտումների պատճառները հայտնաբերելու ուղղությամբ աշխատանքների իրականացումը. «Պետք է պարզել, թե ինչու են կրկնվում խախտումները, որոնք են պատճառները, որ կրկին ու կրկին ստանում ենք ՄԻԵԴ վճիռներ, որոնցում արձանագրվում է արդարացի դատաքննության խախտումներ, անձի ազատության իրավունքի և այլ խախտումներ: Երբ որ պետությունը դրանք ուշադրությամբ ռեֆլեքսիայի կենթարկի, դա նաև պետության համար լավ ուղենիշ կլինի ոլորտային բարեփոխումներ իրականացնելու համար»:
Մանրամասները՝ տեսանյութում:
