24.11.2024 | 14:02
Ավտոմեքենայի դուռը փակվել է, 1-ամյա երեխան մնացել է ներսում․ օգնել են փրկարարները
«Կարտոֆիլը հատով են առնում, նման բան չի եղել»․ ե՞րբ կիջնի «երկրորդ հացի» չլսված գինը․ ՏԵՍԱՆՅՈՒԹ
Տնտեսություն
06.06.2022 | 21:00
Եթե նախորդ տարի այս նույն ժամանակահատվածում կարտոֆիլի գինը 180-200 դրամ էր, ապա այսօր 1 կգ կարտոֆիլը նվազագույնը 500 դրամ արժե։
Կարտոֆիլը, որ առաջնային սպառման ապրանքներից է, հատկապես՝ անապահով խավի համար, արդեն տևական ժամանակ է՝ շուկայում վաճառվում է աննախադեպ բարձր գնով։ Բարձր է թե՛ հին, թե՛ նոր կարտոֆիլի գինը։
Factor TV-ի նկարահանման պահին շուկայում թեպետ գնորդները քիչ էին, բայց բարձր գներից բողոքողների պակաս չկար։
Նախորդ տարվա կարտոֆիլի բերքը սովորաբար բավականացնում էր մինչև մայիս, մայիսին արդեն վաղահաս կարտոֆիլն էր բավարարում ներքին սպառման պահանջները։ 2021-ին բերքը սակավ էր, մի մեծ ծավալ էլ արտահանվել է։ Այս ամենն իր ազդեցությունն է թողել գնագոյացման վրա՝ ասում է գյուղատնտեսության նախկին փոխնախարար Գառնիկ Պետրոսյանը։ Այս ամենին գումարվեցին նաև այս տարվա եղանակային պայմանները։ Ապրիլին գրանցված բարձր ջերմաստիճանի ու խոնավության բացակայության պատճառով վաղահաս կարտոֆիլի ծլարձակումն ուշացավ։
Չնայած վաղահաս կարտոֆիլի ցանքատարածքները, նախորդ տարվա համեմատ, այս տարի ավելացել են, միևնույն է, վերը նշվածը հաշվի առնելով՝ ցածր բերք է սպասվում։ Այս տարի նաև պարարտանյութերի գների բարձրացում տեղի ունեցավ, սա զսպելու համար այս տարվա մարտի 3-ին Կառավարությունը հողօգտագործողներին մատչելի գներով պարարտանյութերի ձեռքբերման աջակցության ծրագիրը հաստատեց, որով պարարտանյութ կտրամադրվի առավելագույնը 3 հեկտար հողատարածքում մշակություն իրականացնելու համար։
Մատակարարների կողմից շահառուներին վաճառվող պարարտանյութի վաճառքի գնի 50 տոկոսի չափով սուբսիդավորում է տրամադրվում ՀՀ բոլոր մարզերում, բայց ոչ ավելի, քան 50 կգ քաշով 1 պարկ պարարտանյութի հաշվով 9000 դրամը։ Շահառուները ծրագրի շրջանակում պարարտանյութեր ձեռք են բերելու միայն նախարարության կողմից հրապարակված ցանկում ընդգրկված մատակարարներից։
Հասկանալով ու գնահատելով արդեն ստեղծված իրավիճակն ու խնդիրները՝ պետք էր ծրագիր մշակել՝ այս իրավիճակը մեղմելու համար, բայց չի արվել։ Աշնան համար կանխատեսումներ անելն առայժմ վաղ է, իսկ կարտոֆիլի գներն առաջիկայում կնվազեն՝ ասում է Գառնիկ Պետրոսյանը։
Հայաստանից կարտոֆիլի հիմնական մասն արտահանվում է Ռուսաստանի Դաշնություն։ Այսօր էլ արդեն շատերը փորձում են արտահանման համար նախնական պայմանավորվածություններ ձեռք բերել գյուղացիների հետ։ Դա իր հերթին կարող է խթանել գնաճը, իսկ առաջին անհրաժեշտության մթերքի թանկությունը միշտ եղել է քաղաքական ամենաբարձր ամբիոններից Կառավարությանը քննադատելու ամենահարմար գործիքը բոլոր իշխանությունների օրոք։
Մանրամասները՝ տեսանյութում։
Սաթենիկ Հայրապետյան
