28.06.2026 | 21:45
Քննարկվում է դիզելային վառելիքի արտահանման ամբողջական արգելքի հնարավորությունը․ Պուտին
Ղազախստանում Սահմանադրության բարեփոխումներն ընդունվել են․ Նազարբաևն այլևս «էլբաս» չէ
Քաղաքականություն
06.06.2022 | 13:05
Ղազախստանում անցկացված հանրաքվեի մասնակիցները ճնշող մեծամասնությամբ հավանություն են տվել սահմանադրական փոփոխություններին՝ երկիրը սուպերնախագահական հանրապետությունից վերածելու ուժեղ խորհրդարան ունեցող նախագահական հանրապետության: Նախագահ Կասիմ-Ժոմարտ Տոկաևի առաջարկած համապատասխան փոփոխությունների օգտին քվեարկել է ընտրողների 77,18 տոկոսը, հայտնել է երկրի Կենտրոնական ընտրական հանձնաժողովը, փոխանցում է DW-ի ռուսական ծառայությունը։
Փոփոխություններին դեմ է հանդես եկել Ղազախստանի քաղաքացիների 18,66 տոկոսը։ Ընդհանուր առմամբ, հանրաքվեին ընտրողների մասնակցությունը կազմել է 68,06 տոկոս։
Նորացված Սահմանադրությամբ ամրագրվում է նախագահի հավասար հեռավոր կարգավիճակը բոլոր քաղաքական կուսակցություններից և շարժումներից, արգելվում է պետության ղեկավարի մերձավոր ազգականներին ղեկավար պաշտոններ զբաղեցնել քվազիպետական հատվածում: Բացի այդ, Ղազախստանի առաջին նախագահ Նուրսուլթան Նազարբաևը զրկվում է «էլբասի»՝ «ազգի հոր» սահմանադրական կարգավիճակից։
Ղազախստանի նախագահ Տոկաևն առաջարկել էր բարեփոխել Սահմանադրությունն այս տարվա հունվարին երկրում տեղի ունեցած արյունալի անկարգություններից հետո։ Կարգուկանոնի վերականգնման ֆոնին Տոկաևը Նազարբաևին և նրա հարազատներին զրկել է ազդեցիկ պետական պաշտոններից։ Փորձագետներն այս հանրաքվեն դիտարկում են որպես Տոկաևի նախապատրաստություն՝ նախագահական երկրորդ ժամկետում իր թեկնածությունն առաջադրելու համար։
