ԱՄՆ-ի նոր պատժամիջոցները ՌԴ-ի դեմ․ ցանկում մի շարք պետական պաշտոնյաներ և ընկերություններ են

ԱՄՆ Ֆինանսների նախարարությունը հրապարակել է պատժամիջոցների նոր ցուցակը, որում ներառված են 17 ռուսաստանցիներ և 16 ընկերություններ Ռուսաստանի Դաշնությունից, հաղորդում է BBC-ի ռուսական ծառայությունը։

Դրանք արգելափակող պատժամիջոցներ են, որոնք նախատեսվում են ակտիվների սառեցում, արգելվում է նաև բիզնես վարել և գործարքներ կնքել դրանց ենթակա մարդկանց և ընկերությունների հետ։ Այս ցուցակում հայտնված անձանց արգելվում է նաև մուտք գործել Միացյալ Նահանգներ։

ԱՄՆ-ի նոր պատժամիջոցների ցուցակում ընդգրկվել են ՌԴ ԱԳՆ պաշտոնական ներկայացուցիչ Մարիա Զախարովան, տնտեսական զարգացման նախարար Մաքսիմ Ռեշետնիկովը, տրանսպորտի նախարար Վիտալի Սավելևը, թավջութակահար Սերգեյ Ռոլդուգինը, որը համարվում է Վլադիմիր Պուտինի մտերիմ ընկերը, գործարար Ալեքսեյ Մորդաշովը՝ գրեթե ողջ ընտանիքի հետ։

Ընկերություններից պատժամիջոցների ցանկում ներառվել են O’Neill Assets Corporation-ը, որն ԱՄՆ իշխանությունների կողմից ուղղակիորեն կապվում է Վլադիմիր Պուտինի հետ, NordGold-ը, որը կապված է Մորդաշովների ընտանիքի հետ, ռուսական խոշորագույն մետալուրգիական «Severstal» կորպորացիան, որը վերահսկվում է Մորդաշովի կողմից։

Նոր պատժամիջոցների մասին հայտարարությունից հետո Մոսկվայի բորսայում Severstal-ի բաժնետոմսերը նվազել են գրեթե 12%-ով։ ԱՄՆ պատժամիջոցները կարող են լրջորեն հարվածել ընկերության արտահանման պայմանագրերին. նրա համար ավելի դժվար կլինի միջազգային վճարումներ կատարել և մուտք գործել մատակարարման շղթաներ, իսկ որոշ գնորդներ կարող են հեռանալ երկրորդական պատժամիջոցների ենթարկվելու մտավախությունից ելնելով։