20.08.2026 | 11:49
ՔՊ-ն որոշել է Արեգա Հովսեփյանին և Հայկ Ֆարմանյանին չընտրել հանձնաժողովի նախագահներ
Թուրքիան Լիտվային «Բայրաքթար» կնվիրի՝ Ուկրաինային փոխանցելու նպատակով
Քաղաքականություն
02.06.2022 | 19:49
Թուրքիան որոշել է Լիտվային նվիրաբերել «Բայրաքթար» անօդաչու թռչող սարք՝ ուկրաինացի զինվորականներին փոխանցելու համար, որի նպատակով լիտվացիներն ամբողջ երկրով 5 մլն եվրո էին հավաքել։ Այս մասին հայտարարել են արշավի համակարգող Անդրիուս Տապինասը և Լիտվայի պաշտպանության նախարար Արվիդաս Անուշաուսկասը, գրում է pravda.com.ua-ն։
«Դա անհավատալի է, սակայն Թուրքիան հենց հիմա համաձայնեց անհատույց «Բայրաքթար» փոխանցել, որի համար լիտվացիները գումար էին հավաքել։ Դա պարզապես անհավանական է։ Հավաքված միջոցներով կգնենք անհրաժեշտ զինամթերքը, իսկ մնացած գումարը նույնպես կուղղվի Ուկրաինային աջակցելու համար»,- նշել է Անուշաուսկասը։
«Թուրքերն այնքան տպավորված էին Ուկրաինային օգնելու՝ Լիտվայի ժողովրդի ցանկությունից, որ Թուրքիան որոշեց նվիրաբերել «Բայրաքթար» մարտական անօդաչու թռչող սարքը՝ ամբողջ օպտիկայով և անհրաժեշտ սարքավորումներով: Այժմ մենք ունենք «Բայրաքթար», ունենք դրա համար սարքավորումներ և դեռ ունենք 4,4 միլիոն եվրո»,- իր հերթին գրել է Տապինասը ֆեյսբուքյան իր էջում։
Նրա խոսքով՝ թուրքական կողմը խոստացել է հնարավորինս շուտ, մոտավորապես երեք շաբաթվա ընթացքում, անօդաչու թռչող սարքը պատրաստել և զարդարել այն Լիտվայի և Ուկրաինայի դրոշների գույներով։
Հավելենք, որ նախօրեին էլ Լիտվան ու Թուրքիան համաձայնագիր էին կնքել, որը թույլ է տալիս Վիլնյուսին «Բայրաքթար» մարտական անօդաչու թռչող սարքեր գնել:
Էմմա Չոբանյան
