17.01.2026 | 12:14
«Կայուն»-ից դեպի «դրական». Fitch Ratings-ը բարձրացրել է Հայաստանի վարկանիշի հեռանկարը
F-16 կործանիչների հարցում թուրք-ամերիկյան բանակցություններում դրական մթնոլորտ է տիրում․ Թուրքիայի ՊՆ ղեկավար
Քաղաքականություն
02.06.2022 | 16:24
Անկարան հավատում է, որ ԱՄՆ-ը կապահովի Թուրքիայի կարիքները F-16 կործանիչների հարցում։ Թուրք-ամերիկյան բանակցություններում այս հարցում դրական մթնոլորտ է տիրում։ Այս մասին հայտարարել է Թուրքիայի պաշտպանության նախարար Հուլուսի Աքարը, գրում է «Անադոլու» գործակալությունը։
Նա նշել է, որ F-16-երի մատակարարման շուրջ քննարկումներ են անցկացվել ինչպես Անկարայում՝ ԱՄՆ պատվիրակության, այնպես էլ Վաշինգտոնում՝ թուրքական պատվիրակության մասնակցությամբ, այդ թվում՝ ԱՄՆ Կոնգրեսի անդամների հետ շփումների ժամանակ։
Ըստ Աքարի՝ խոսքն ինչպես F-16 Block Viper ինքնաթիռների գնման, այնպես էլ Թուրքիայի ռազմաօդային ուժերին սպասարկող ինքնաթիռների արդիականացման մասին է։
«Մենք հավատում ենք, որ մեր դաշնակիցը, ի դեմս ԱՄՆ-ի, կգնա Թուրքիային ընդառաջ։ Վաշինգտոնը չի կարող արհամարհել պաշտպանության և համատեղ գործողությունների կարևորությունը»,- ասել է թուրք նախարարը։
Նա ընդգծել է, որ դա ոչ միայն Թուրքիայի ռազմաօդային ուժերին է վերաբերում, այլև ՆԱՏՕ-ին ու Եվրոպային։
«ՆԱՏՕ-ի հզորությունը կախված է ռազմաքաղաքական դաշինքի դաշնակիցներից յուրաքանչյուրի ուժից։ Թուրքիայի ռազմաօդային ուժերը պետք է ուժեղացվեն»,- ասել է Աքարը։
Էմմա Չոբանյան
